Author Details

  • विप्लव ढकाल Total Record 44

    कक्षाकोठाभरि हल्ला छ
    किन पढ्दैनन् नानीहरू ?

    म इतिहास पढाउन खोज्छु
    उनीहरू जङ्गली चरा जस्तै हल्ला गर्छन् !
    म गणित पढाउन खोज्छु
    उनीहरू पहाडी खोला जस्तै हल्ला गर्छन् !
    म भाषा पढाउन खोज्छु
    उनीहरू भाषा नै लाटो हुने गरी हल्ला गर्छन् !
    म ‘हल्ला नगर’ भन्छु
    उनीहरू फेरि हल्ला गर्छन् !

    सायद म बाँचेको समयमा नै
    कुनै गम्भीर त्रुटि हुनुपर्छ !
    नत्र यो हल्ला कसरी ‘हल्ला’ हो र ?
    यो हल्ला आफैमा एउटा विचार हो
    यो हल्ला आफैमा एउटा जीवन हो
    यो हल्ला आफैमा एउटा सपना हो !

    नानीहरू !
    म पनि अब तिमीहरूसँगै बसेर हल्ला गर्छु !!

    (प्रकाशोन्मुख कवितासङ्ग्रह ‘च्याउको जङ्गल’ बाट)