Author Details

  • पुण्य खरेल Total Record 12

    ए उम्मेदवार महोदय !
    बढेमानको ऐनाअगाडि उभिएर
    कपाल कस्तो पार्दा चिटिक्क हुन्छ
    लुगा कस्तो लगाउँदा खुल्छ
    नयाँ दामी लगाउँदा राम्रो हुन्छ
    कि पुराना सस्ता लगाउँदा राम्रो
    सोच विचार
    भाषण गर्दा कुम कसरी हल्लाउने
    कसरी दायाँवायाँ ढलक ढलक गर्ने
    अभ्यास गर रिहर्सल गर
    अरब खरब कमाउन सजिलो छैन
    ठाउँठाउँमा महलहरू जख्न सजिलो छैन ।
    ए उम्मेदवार महोदय
    कुराहरू कथ
    शब्दहरू खिप
    होशियार होऊ
    बोलीमा लोली मिलोस्
    स्वरमा मधुरता घुलोस्
    भाषण काइदाको होस् ।
    बेला छँदै ए उम्मेदवार महोदय
    छान शब्दकोषबाट मिठामिठा शब्दहरू
    इन्साइक्लोपेडियाबाट मोहित पार्ने विषयहरू
    खोज जनता लठ्ठिने एकोहोरिने कुराहरू
    पत्ता लगाऊ छाँट पारेर काइदासँग बखान गर्ने कुरा
    नेपालीहरू सारै सोझा छन्
    सोझाहरूलाई छक्याउन सजिलै छ
    रामले भए पनि छक्याउने नै हो
    श्यामले भए पनि छक्याउने नै हो
    छक्याएको हुँदै होइन झैं गरी छक्याउन
    एक दम वचनवद्ध झैं गरी थाङ्नामा सुताउन
    तिमीले काइदा पुर्याउनु पर्छ
    अभ्यास गर रिहर्सल गर ।

    मेचीनगर, झापा