Author Details

  • जे.सागर Total Record 14

    भौजाहा बच्चाले
    आवेगमा
    कच्याककुचुक पारेको खेलौना जस्तो
    सारै सस्तो
    बिचरो काठमान्डू !
    उकुसमुकुस नियति बोकेर
    आर्यघाटको बाटो कुरेको बिरामी झैं
    अभिशप्त राजधानी
    स्वयम् महाभागी बनेर
    धेरैलाई
    भाग्यमानी बन्ने अवसर दिँदै छ
    अरु भन्छन्, “काठमान्डूले देश खायो”
    म भन्छु, “देशले काठमान्डू खायो”
    अनुहार भरि कुरूप डण्डीफोर बोकेकी
    तरुनी हो कि ?
    कि
    एउटा लथालिङ्ग घर हो ?
    दुर्गन्ध
    यसको परिचय भएको छ
    लाखौँ नगरबधु हुर्काउने यो शहर
    स्वयम् एउटी नगरबधु त होइन ?
    लाग्छ
    पल पल मरिरहेछ काठमान्डू
    आफ्नू अन्तिम संस्कार
    आफैं गरिरहेछ काठमान्डू
    हो है
    मरिरहेछ काठमान्डू !

    चितवन