Author Details

  • प्रकाश चापागाइँ Total Record 14

    आऊ एउटा सहमति गरौँ
    अलिखित, अमुर्त र अव्यक्त
    तर विशिष्ट, सशक्त र परिपक्क
    तिमी मेरो तारिफ गर
    म तिम्रो गर्छु
    तिमी मैले बिगारेका कुरा सच्याऊ
    म तिम्रा कुरामा फुलबुट्टा भर्छु ।

    हामी दुवैलाई थाहा छ,
    सिधा औंलाले घिउ आउँदैन
    त्यसैले, तिमी औंला बङ्ग्याऊ
    म खुट्टा घुमाउँछु
    तिमी उच्च नैतिकताको कुरा गर
    म समर्थन जनाउँछु
    यसरी तिमी पनि व्यवहार मिलाऊ
    म पनि केही कमाउँछु ।

    तिमी मेरो छोरालाई छात्रवृति मिलाइदेऊ
    म तिम्रा काममा समर्थन जनाइदिउँला
    तिमी मेरो सालोलाई ठेक्का दिलाइदेऊ
    म तिम्रो ससुरालीको घर बनाइदिउँला
    तिमी मेरो सदर गर
    म तिम्रो कदर गर्छु
    यसो गर्दा तिमीलाई नि कसैले शङ्का गर्दैन
    मैले पनि स्पष्टीकरण दिइरहनु पर्दैन ।

    किनकि,
    मैले आफैंलाई दिन मिल्दैन
    तिमीले नि आफैंसँग लिन मिल्दैन
    तिमी मलाई सम्मान गर
    म तिमीलाई खादा ओढाउँछु
    तिमी मेरा लागि श्रोता तयार गर
    म तिम्रा लागि दर्शक बढाउँछु ।

    यसरी,
    हाम्रो नाम पनि हुन्छ, दाम पनि हुन्छ
    अरुले देख्दा काम पनि हुन्छ
    तिमी मलाई प्रतिभावान भन
    म तिमीलाई निष्ठावान भन्छु ।

    त्यसैले,
    आऊ एउटा सहमति गरौँ
    अलिखित, अमूर्त र अव्यक्त
    तर विशिष्ट, सशक्त र परिपक्क
    तिमी मलाई क्यावात् भन
    म तिमीलाई स्यावास भन्छु ।
    तिमी मेरो समर्थक बन
    म तिम्रो प्रवक्ता बन्छु ।

    हेटौडा