डिल्लीप्रसाद अधिकारीहैरान भइसकेँ
नयाँ नयाँ काम थाल्दा हैरान भइसकेँ
बलुवामा पानी हाल्दा हैरान भइसकेँ ।
भन्नुपर्दा जागिर खान्छु बेरोजगार छैन
च्यात्तिएको पाइन्ट टाल्दा हैरान भइसकेँ ।
ब्रत पनि बस्छे स्वास्नी दीर्घायु होस् भनी
भन्छे जँड्याहा पति पाल्दा हैरान भइसकेँ ।
तिम्रो सिन्दुर धुलोसँगै उड्यो भनेपछि
भेटिएन धुइरो चाल्दा हैरान भइसकेँ ।
इमान इज्जत धनपैसा बाले कमाएको
भएजति सबै फाल्दा हैरान भइसकेँ ।
जाती हुन्थ्यो बरु त्यही टुक्की बाल्दाखेरी
अहिलेको यो विद्युत बाल्दा हैरान भइसकेँ ।
खगेनकोट– ९, मंसिरी, जाजरकोट
