१.भ्रष्टाचारीको कथा

राता रात जुटी दिनादिन कुटी आश्वासनै को बुटी !!
लाखौं नोट लुटी बनाइ सुकुटी ताप्के तताई भुटी !!
पारी टम्म मुठी स्वदेश ढुकुटी छान्दै ढिकीमा कुटी !
भ्रष्टाचार गरे भरे खुब भुँडी रुन्छन् ति पार्टी फुटी !!

२.पजेरो को वास्तविक रुप

डिक्की, बोनट, झ्याल, द्वार, सिटमा चोक्टा थिए ढाडका !
देखे इन्धन त्यो थियो रगतको पाङ्ग्रा थिए हाडका !
तिम्रै बक्ष बन्यो खुला सडक त्यो दौड्यो पजेरो जब !
तिम्रो लास थियो मसान घरमा उस्को थियो उत्सव !

३. कुहिएको जेरी

ए बी सी कखरा दुरुस्त नबुझी दर्जा लियौ माथिको !
मेरा चामल थन्किए सडकमा तिम्रो बिकायौ पिठो !!
बोली मात्र दियौ अथाह गुलियो खै कार्य सम्पादन !
थ्यो जेरी गुलियो समस्त कुहियो झिंगा डुले भन्भन !!

नेपालगञ्ज