गायत्री परिरोशनीशब्दार्थ कविता
अपराध— क्रान्तिकारीले भाले बन्नका लागि गर्ने शारीरिक अभ्यास ।
आन्दोलन— धन, जन र मनले पाखुरी बजार्नमा विरक्त लागेपछि कि त मुक्ति, कि त अपाङ्गताको योग्यता हासिल गर्न र वातावरणलाई कार्बनमय बनाउन नेपाली मात्रका लागि उपलब्ध आक्रोशमूलक शैक्षणिक अभ्यास ।
देशभक्ति— पातालेश्वरको सन्देश र दक्षिणेश्वरको कृपादेशअनुसार नेताहरूले जप गर्ने मन्त्र ।
नयाँ संविधान— नयाँ वीरबलहरूको नयाँ खिचडी ।
नेता— आचरण तथा नीतिनियमका मलामी ।
नेपाल— जस्तोसुकै कुरा हुँदा पनि उदेक मान्न नमिल्ने ठाउँ ।
न्याय— सोच वा चिन्तनको लोपोन्मुख र दुर्लभ प्रजाति ।
भ्रष्टाचार— सार्वजनिक पदमा रहँदा नगरी नहुने अनिवार्य सैनिक तालिमको एक प्रकार ।
मन्त्री— अगस्ती ऋषिका बहुअवतार ।
मानवअधिकार— मानिलिऊँ अर्थको धिक्कार शब्दका अगाडि लाग्ने उपसर्ग, जसको खोजीलाई प्रायः अपशकुन मानिन्छ ।
मूल्यबृद्धि— लोकतन्त्रमा विकास शब्दका सट्टामा आउने सर्वनाम ।
राजनीति— अपकार गर्न तालिमप्राप्तले गर्ने खेलो ।
राजनीतिक दल— सार्वजनिक शौचालयमा आउने गन्धका प्रकारहरू ।
लोकतन्त्र— सामाजिक परिपाटी, जुन पशुहरूका लागि मात्र उपयुक्त हुन्छ ।
व्यवस्थापिका— संसद्— आर्यघाटको दक्षिणमा पर्ने झोकसन्तप्त कण, वादी र बाबुहरूले भजन गर्ने र सभासाद्हरूले दिउँसै सपना देख्नका लागि लोलाउने र झकाउने ठाउँ ।
सञ्चारमाध्यम— फोहरको थुप्राहरूलाई पटकपटक सुन्दर देखाउने यन्त्र ।
सुशासन— भाषामा यस्तो शब्दको पनि निर्माण गर्न मिल्छ ।
काठमाडौं
