नेपाली हास्यव्यङ्ग्य अनलाइन पत्रिका

भारतीय जनताहरू नरेन्द्र मोदी जस्तो चमत्कारिक नेता पाएर दङ्ग परेछन् । हामी पनि कम छैनौँ । दङ्ग पर्नका लागि हाम्रो देशमा पनि त्यस्ता चमत्कारिक मोदीहरू कति छन् कति ।

भारतका मोदी चियाको कित्लीबाट जन्मेर अघि बढ्दै प्रधानमन्त्रीको पदसम्म पुगेछन् । हाम्रा मोदीहरू कोही जाँतेकिराको ¥यालबाट उत्पन्न भएर त कोही बन्दुकको नालबाट निस्किएर प्रधानमन्त्री भएका छन् । उताका मोदी हिँड्दा जमिन नै हल्लिँदो रहेछ, हाम्रा मोदीहरू हिँड्दा उनीहरूका सुरालको इँजार अवस्य हल्लिन्छ । उताका मोदीले भाषण गर्दा आकाश थर्किन्छ अरे, यताका मोदीहरूले बोल्न खोज्दा कसैका मुखबाट फुस्स फुस्स हावा निस्कन्छ, कसैको कुम हल्लिन्छ र कत्तिको चोर औंंलो ठडिन्छ ।

उताका मोदीले १० वर्षको अवधिमा पञ्जाव राज्यलाई सम्पन्न र विकसित बनाएर सिङ्गै भारतलाई त्यस्तै बनाउँछु भन्दै चुनाव लडेर जितेछन् । यताका मोदीहरूले १० वर्षमा मुलुकका हजार्रौ संरचना ध्वस्त बनाएर देशलाई बारुद र भ्रष्टाचारको कुइरीमण्डलमा फँसाएर चुनाव लडे र पनि चुनाव जिते त ! कम पुरुषार्थी छन् यताका मोदीहरू !

हाम्रा मोदीहरू आफूले देशको विकास कसरी नगर्ने र अरुले गर्न खोज्दा कसरी भाँजो हाल्ने भनेर षड्यन्त्र गर्दा गर्दै बूढा भएर मर्छन् । उताका मोदी रातारात कामै गरेर देखाउने झमेला गर्दा रहेछन् । यताका मोदीहरूलाई विकास गर्न कागज भए पुग्छ, विकासको चाङ्ै लगाइदिन्छन् । उताका मोदी धर्तीमै सडक बनाउँदा रहेछन्, घरघरमै विजुली बाल्दा रहेछन् । कस्ता मूर्ख !

हाम्रा मोदीहरूलाई जाति, लिङ्ग, धर्म, सम्प्रदाय, दलित, अपाङ्ग, बृद्ध अनेकानेक वर्गको हितका लागि प्रदान गरिने सेवा सुविधाको प्रतिशत मिलाउन क्याल्कुलेटर थिच्दा थिच्दै दशक बित्छ । राष्ट्र प्रमुुखदेखि सार्वजनिक शौचालयको पालेसम्मको भागबण्डा गर्ने चटारोले विकास निर्माणका बारेमा सोच्नै भ्याउँदैनन् । कति गाह्रो छ ! उताका मोदीलाई भागबण्डे विकासमा विस्वासै रहेनछ । भागबण्डै नगरी भकाभक काम गरेपछि विकास त भइहाल्छ नि, कुन नयाँ कुरा भयो र !

हाम्रा मोदीहरू सडक, खानेपानी, विद्युत, उद्योग इत्यादिका योजना लिएर हिँड्न भ्याउँदैनन् । बरु काखीमा भ्रष्टहरूलाई च्यापेर कुनकुन मालदार पदमा नियुक्त गर्न सकिन्छ भनेर दौडिन वाध्य छन् । हाम्रा मोदीहरू कार्यपालिका र व्यवस्थापिका मात्र होइन न्यायपालिकालाई पनि भ्रष्टाचारको अखडा बनाएर संसारमा नमूना देश बनाउन कृयाशील छन् । उनीहरू भ्रष्टाचारको दलदलमा डुबेका न्यायाधीशलाई सर्वोच्च अदालतमा नियुक्त गर्ने कसरतमा महिनौंदेखि सुरालको इँजारसम्म बाँध्न नभ्याई कस्सिएका छन् । कस्तो मुस्किल छ बिचराहरूलाई !

यताका मोदीहरू अग्रगामी भएकाले अग्रजका खुट्टा काट्न सधैं तत्पर छन्, उताका मोदी भने अग्रजका खुट्टामा ढोग्न अग्रसर हुँदा रहेछन् । उताका मोदीले कनिष्ठ भए पनि योग्य भए पछि माथिल्लो पद पाउँदा रहेछन्, यताका मोदीहरू आर्यघाटमा लम्पसार पर्दा पनि कनिष्ठलाई सिट छाडेर गैर जिम्मेवार हुन चाहँदैनन् । उताका मोदीहरू चुनाव हार्दा पनि तत्काल हार स्वीकार गर्दै जनताप्रति नतमस्तक हुँदा रहेछन्, यताका मोदीहरू चुनाव हार्नासाथ धाँधलीको आरोप लगाउँदै मतदातालाई समेत सत्तोसराप गर्न थाल्छन् । यस्ता क्रान्तिकारी छन् हाम्रा मोदीहरू ।

उताका मोदी मोटर, रेल र हवाइजहाजका गतिलाई पनि उछिनेर विजुलीका गतिमा दौडिँदा रहेछन्, यताका मोदीहरू गधा, गोरुगाडा र कछुवालाई पछि पार्दै जाँतेकिराका गतिमा अघि बढिरहेछन् । यस्ता नमूना मोदीहरू बिचरा भारतसँग छन् ?