नेपाल नौलो
यता देश खाने उता देश लाने,
कुरा यी नमानेपछि ज्यान जाने ।
उतैबाट भित्रीरहेको छ औलो,
त्यसैले बनेको छ नेपाल नौलो ।।
लफङ्गा र झल्ला बढे यत्रतत्र,
भए कुन्डले मन्डले झन् प्रसस्त ।
यिनैले गरे देशमा भाँडभैलो,
त्यसैले बनेको छ नेपाल नौलो ।।
हिमालीय छानो छ यो देश सानु,
तथापि त्यहाँ पर्छ मागेर खानु,
दुखी दीनका निम्ति गाडिन्छ मौलो,
त्यसैले बनेको छ नेपाल नौलो ।।
उता गाउँमा मर्नलागे गरीब,
यता केन्द्रमा मोजमस्ती अतीब ।
दुखी छट्पटिन्छन् नपाएर जाउलो,
त्यसैले बनेको छ नेपाल नौलो ।।
चुनावीय भो देशको संविधान,
सबै छन् बसेका यही देश खान ।
अलेली गरेरै खनिँदैछ खौलो,
त्यसैले बनेको छ नेपाल नौलो ।।
यहाँ भाइभाइ प्रतिद्वन्द्व भा’छन्,
दयाधर्म सारा हराएर गा’छन् ।
बगेको छ उर्लेर जातीय खोलो,
त्यसैले बनेको छ नेपाल नौलो ।।
पुरानो भयो देशको संस्कृतित्व
भनी ल्याइँदैछन् विदेशीय वस्त्र ।
कठै जेलमा छन् नि साडी र चोलो !
त्यसैले बनेको छ नेपाल नौलो ।।
छ नेतृत्वलाई अनीकाल कत्रो,
त्यसैले त चाहिन्छ सत्तो र भत्तो ।
पुरा देशले नै भिरेको छ झेउलो,
त्यसैले बनेको छ नेपाल नौलो ।।
उहिल्यै थिए जातमा चार मात्र,
हिजो आज छन् चार्सए जातभात ।
ठुलाले यही नै भनेको, गरेको
हुनाले बनेको छ नेपाल नौलो ।।
सुरूङ्गा, झापा