आर.आर. चौलागाईंपाँच खोक्तक
(१)
भित्ताको पनि कान हुन सक्छ बिस्तारै बोले कसो होला ?
बाटोमा पनि खाडल हुन सक्छ बिस्तारै हिँडे कसो होला ?
जे पनि हतारमा नगरौँ हजुर ! जतिबेला जे पनि हुन सक्छ
पानीमा पनि जहर हुन सक्छ बिस्तारै पिए कसो होला ?
(२)
मान्छेहरू देखिन्छन् एउटा हुन्छन् अर्कै यो कस्तो जमाना
मान्छेहरू बोल्छन् एउटा गर्छन् अर्कै यो कस्तो जमाना
अब त मान्छेहरू बाघ, भालु, सर्प र ब्वाँसाभन्दा पनि डरलाग्दा भैसकेछन्
मान्छेहरू लेख्छन् एउटा पढ्छन् अर्कै यो कस्तो जमाना !
(३)
नेपाल रुँदा तिमीलाई दुख्दैन भने तिमीलाई कसरी नेपाली भनौँ ?
हिमाल जल्दा तिमीलाई पोल्दैन भने तिमीलाई कसरी हिमाली भनौँ ?
ढाका टोपी र दौरा र सुरुवालले मात्रै राष्ट्रियता झल्किँदैन महाशय !
पराईले माटो मिच्दा तिम्रो रगत तात्दैन भने तिमीलाई कसरी गोर्खाली भनौँ ?
(४)
फूल पनि सँगै राख्ने झार पनि सँगै राख्ने यो तिम्रो कस्तो काम ?
पानी पनि सँगै राख्ने हिलो पनि सँगै राख्ने यो तिम्रो कस्तो काम ?
मलाई माफ गर प्रिय ! मैले कमसल ठानेका चिजहरू तिमीलाई ‘महान’ लाग्न पनि सक्छन्
सुन पनि सँगै राख्ने पित्तल पनि सँगै राख्ने यो तिम्रो कस्तो काम ?
(५)
हिजो दबाबमा थियौ आज मनखुसीमा छ्यौ बधाई छ तिमीलाई
हिजो करकापमा थियौ आज आफूखुसीमा छ्यौ बधाई छ तिमीलाई
अब कोही छैन तिमीलाई हस्तक्षेप गर्ने बल्ल स्वतन्त्र भएकी छ्यौ
हिजो अँध्यारोमा थियौ आज उज्यालोमा छ्यौ बधाई छ तिमीलाई ।
हेटौडा, मकवानपुर
