रहस्य
तिम्रो मुस्कानको मिसकल
वास्तविक हो कि व्यापारिक ?
साहुनी मैले ठम्याउनै सकिनँ ।
चुनावका बेला
नेताजीको मुस्कान पनि
ठीक तिम्रो जस्तै लाग्थ्यो ।
असार याममा
मुखिया बाको मुस्कान पनि
यसरी नै फक्रिन्थ्यो
सयपत्री फक्रिए जस्तो
र अलप हुन्थ्यो भकारीमा पसेर
प्रत्येक मङ्सिरमा ।
काठमान्डूबाट कर्णाली पसेर
यसरी नै मुस्कुराउथे
भिमकाय बैदेशिक रोजगारका शिसमहलहरू ।
यसरी नै खुल्थे
निस्चल आकाश खुले जस्तै
एनजिओ आइएनजिओका सङ्ला छाती ।
साहुनी,
संसदमा छलफल हुने गर्छ रे
देशका लागि ।
जसरी मेरो मेटिङ हुने गर्छ
कुटो र कोदालो सँग ।
जसरी मेरो सम्वाद हुने गर्छ
गैैँती र बेल्ची सँग ।
जसरी मेरो वहस हुने गर्छ
हलो र हँसिया सँग ।
एक थान जिन्दगी र एक गाँस फापर सँग ।
साहुनी
सन्देह लाग्छ
“कही संसदको त्यो बहस पनि
तिम्रो मुस्कान जस्तै रहस्यमय त छैन ?”