अरुअरु त्रिशुल बाबाहरू
त्रिशुल बाबा भन्ने एक चौधरी ठिटोले असारमा भुँइचालो जान्छ भनेर गरेको भविष्यवाणी झूटा सावित भएकोले त्यो बिचरोलाई जनताहरूले कपाल भुत्ल्याएर थप्पड लगाउँदै थानामा लगेर थुनाए । उसलाई आइन्दा त्यस्तो भविष्यवाणी गरेर नेपाली जनताको निन्द्रा बिथोल्न नपाउने शर्तमा कायल गरिएको पनि देख्नसुन्नमा आयो ।
त्रिशुलबाबाप्रतिको यो दुव्र्यवहार निन्दनीय छ । कत्राकत्रा मानिसले गरेका कस्ताकस्ता भविष्यवाणीहरू सयौँ पटक झूटा सावित भएका छन् यो देशमा । तिनीहरूलाई कसैले थप्पड हान्न सक्तैन । कसैले तिनीहरूको जगटा छर्न सक्तैन । जाबो एउटा मन्दिर पेटीमा बस्ने जोगीको धोती तानेर के फूर्ति गर्नु हामीले ! धेरै भए त्रिशुलबाबाको भविष्यवाणीले केही हजार अन्धविश्वासी नेपालीहरूको एक रातको निन्द्रा बिग्रियो होला । यहाँ हजारथरिका घातक भविष्यवाणी गरेर करोडौँ नेपालीको भोक, निन्द्रा, र अमनचैन बिगार्ने कयौँ त्रिशुलबाबाहरू मस्तीसँग हाम्रा वरिपरि कार चढेर घुमिरहेका छन् । जहाज चढेर देशविदेश शयर गरिरहेका छन् ।
नयाँ नयाँ त्रिशुलबाबाहरू धमाधम जन्मिरहेका छन् । देश विदेशबाट बाबाहरू आइरहेका छन् । भारतबाट, अमेरिकाबाट र अन्तबाट । गाउँबाट शहर पसेका छन्, जङ्गलबाट राजधानी छिरेका छन् । ती त्रिशुलबाबाहरू पटकपटक गलत भविष्यवाणी गरिरहेका छन् ।
कुनै सन्तबाबाले यो देशलाई सिङ्गापुर बनाएर उपत्यकाका सडकलाई खानेपानीले धोइदिने भविष्यवाणी गरेका होइनन् ? आखिर यो देश बन्यो झिङ्गापुर । यहाँका सडकलाई खानेपानीले होइन बरु ढल फुटेर मान्छेका मलले चाहिँ पखालिरहेको छ । उनले ‘म फेरि नेपालको प्रधानमन्त्री हुन्छु’ भनेर गरेको भविष्यवाणी र त्रिशुलबाबाले भूकम्प जान्छ भनेर गरेको भविष्यवाणीमा के फरक छ ?
धेरै त्रिशुलबाबाहरूका माझ अचेल एक नयाँ बाबा आएका छन् । सक्कली बाबा त यी पो रहेछन् भन्ने ठान्दाठान्दै ‘म दुई वर्षपछि नेपालको राष्ट्रपति बन्छु’ भन्ने भविष्यवाणी गरेर उनले पनि आफूलाई त्रिशुलबाबा नै ठह¥याए । यो देशलाई स्विट्जरल्याण्ड बनाउँछु भनेर उनले गरेकोे भविष्यवाणी उनकै चेलाचपेटा र अनुयायीहरूको चपेटामा परेर चौपट हुने खतरामा पुगेको छ । ‘जति बाबा आए पनि कानै चिरेका’ भनेको यही रहेछ ।
यी धेरै दौरासुरुवाल वा सुटबुटधारी त्रिशुलबाबाहरूको तुलनामा भूकम्पको भविष्यवाणी गर्ने त्रिशुलबाबा धेरै नै सत्य सावित भएका छन् । उनले असारमा भूकम्प जान्छ भनेका थिए । असार महिनामा यो देशको कुन कुनामा भूकम्प गएको छैन, लौ भन्नुस् त ? भूकम्प आउन जमिन नै हल्लिनु पर्छ र ! तराईमा दिनदिनै गइनै रहेको छ भूकम्प । दैलेखको खाद्यान्न आतङ्कलाई तपाईँ कति रेक्टर स्केलको भूकम्प मान्नुहुन्छ ? पेट्रोल डिजेलको हाहाकार, दिनदिनैका बन्द, हड्ताल र चक्काजमहरूले कति मानिसको जीवनमा ल्याइरहेको छ भूकम्प ? कोब्रा, टाइगर, गोमन, चितुवा, स्याल, भालु जस्ता समूहहरूले ल्याएका छैनन् र भूकम्प यो देशमा ?
यस्ता भुकम्पहरू बढ्दै र थपिँदै जाँदा जेठमा चुनाव हुन्छ भनेर त्रिशुलबाबाहरूले गरेको भविष्यवाणी फेल भएजस्तै मङ्सिरमा हुन्छ भनेर गरेको भविष्यवाणी पनि मित्थ्या सावित भयो भने कत्रो भूकम्प जाला यो देशमा ? कुनै त्रिशुलबाबाले भन्न सक्छ ?
३१ असार २०६४
‘स्वाहा’ सङ्ग्रहबाट