नवराज श्रेष्ठनो एन्सर
जुन बल्छीको चारो खान्छ
माछा उसैको हुन्छ
पाप गरेको भन्ने कि धर्म ?
हरपल गङ्गाजल स्नान गर्ने माछाले
मरेपछि पनि सुख पाउँदैन
तातो कराई माथि उम्लिएको तेलमा
झ्वाइँ झ्वाइँ जल्नु पर्छ ।
पीडितले न्यय पाउला र यो देशमा ?
न्यायाधीशले नै घुस लिएपछि
कसको पक्षमा फैसला गर्छ ?
हरेक सरकारी कार्यालयमा
टेबुलमुनिबाट लेनदेन हुन्छ
लिने र दिने दुवैलाईच्याप्प समातेर
नाङ्गो बनाएर
काउसोको माला लगाएर
रत्नपार्कमा लगेर छोड्नु पर्छ
बिर्सनु हुँदैन त्यसलाई चारपाटा मुड्नु पर्छ ।
के गर्नु बखान
जोडेर उखान
भ्रष्टाचार मौलाएकै छ
नानी– पानी– जवानी पलायन भएकै छ
उ गर्छु भनेर गएको मान्छेले
उ गरेर उ गर्छ
उ गर्दागर्दै उसको उ भएछ
देश र जनताका लागि लड्दालड्दै
त्रिचराको बल वैँश र जवानी गएछ ।
तपाइँले संविधान लेख्नु भयो भने
कति दिनमा तयार पार्नु हुन्छ ?
एक वर्ष
एक महिना
एक दिन
एक घण्टा
वा
एक सेकेण्ड ?
लेख्नेहरूको इच्छा हुनुपर्छ
शक्ति आफैं उत्पन्न हुन्छ
एकै बसाइमा महाकाव्य त तयार हुन्छ ।
कसले भनेको ? नेपालको संविधान लेख्न
६०१ को बथान चाहिन्छ
पटक पटक चुनाव हुनु पर्छ
जारी गर्ने मिति सारी रहनु पर्छ
भनेर ।
यो सबै सुशुप्त सुनामी छाल हो
नेपाली जनतालाई उल्लु बनाउने चाल हो
एचआइ भी बाट बच्ने भरपर्दो माध्यम
प्यान्थर अनि ढाल हो ।
हामी हाक्काहाक्की भन्न लाज मान्छौँ
भित्रभित्रै त्यही काम गर्छौं
अनि त सावधानी अपनाउन बिर्सन्छौँ
त्यही भएर
भिआइपीको सङ्ख्या भन्दा
एचआइभीको सङ्ख्या बढ्दै गा’छ
के तपाइँलाई था’छ ?
एउटै चर्पी प्रयोग गर्दैमा
जुठो खाँदैमा
अँगालो मार्दैमा सर्दैन
नसरेसम्म बचाउने प्यान्थर
सरेपछि नो एन्सर !!
जोगिमारा– ७, भारपाङ, धादिङ
