सरकार र क्रसर व्यापारीका रोडा रडाकोमा राँको चल्यो । साँढेको जुधाइ बाच्छाको मिचाइको महँगीमा परेका जनताको रुन्चे डाँको चल्यो ! पहिले जनता रुनु न हाँस्नुमा थे भने झन् लोकतन्त्रमा त रुनु तर नहाँस्नु भन्ने अवस्थामा पुगे ! यसरी जनतालाई सबैप्रकारको मारमा पार्ने सरकारलाई धन्यवाद !

सरकारसितको भित्री साँठगाँठमा हो कि बाहिरी छाँटकाटमा हो लुतुलुतु पाँच छ सय क्रसर उद्योग वैधअवैध रूपले चलाउन दिएर कसैले राजमार्गको सडक छेउमा, कसैले वनजङ्गलको माझमा, कसैले चुरेपहाडै बोकेर भारततिर पुर्याउने हेतुले चुरेका टाउकामा क्रसर उद्योग खोल्न खोलाउन सफल हुने उद्योगीलाई पनि धन्यवाद ! नेताले नीतिनियम पालना नगर्दा नेताकै छत्रछायामा हुने उद्योगीहरूले सिको टिपेर गरेको मनोपोलीलाई बोलीमा बिलाइदिने बहादुरलाई धन्यवाद ! नयाँ नेपाल बनाउन चुरेपहाड जस्ता प्राकृतिक डाँडाकाँडा सम्याएर सिङ्गो नेपाल मैदान पार्न ऐतिहासिक र वातावरणीय महत्वको ठाउँमा क्रसर उद्योग खोल्न कसको पालाको सरकारले आँट्यो त्योबेलाको सरकारलाई अझ धेरै धन्यवाद ! हड्डी खान लागेका कुकुरलाई हटाएझैँ प्रकृति बिनास गर्ने ठाउँका क्रसर उद्योगीलाई कहिले हट कहिले बस भन्ने सरकार र नियम पालना गर्न अटेरी गरी खुलेआम रोडा बालुवाका भाउ दोब्बर पार्न सफल हुने ब्यापारीलाई उभयपक्षीय बहादुरीको धन्यवाद ! साँढेको जुधाइ बाच्छाको मिचाइमा जनतालाई सताएर सत्ता चलाउनेलाई त सदाबहार धन्यवाद ! आमाको छाती चिरेसरह चुरेको पहाडै बोकेर रोडाढुङ्गा मुलुकबाहिर पुर्याई आइसीमा बेचेर एनसीमा रोडाढुङ्गाको भाउ बढाउन सक्ने स्वतन्त्र व्यापारीलाई नदिई हुँदैन धन्यवाद !

नुन चिनी तेल पेट्रोलमा झैं दस बीसमात्र नभई जनताका ढाडै भाँच्नेगरी चौध पन्द्र हजार परेको एकट्रीप रोडा बालुवालाई अठ्ठाइस तीस हजारमा बजार ल्याइपुर्याउँदा सरकार टुलुटुलु हेरेर बस्दा कसले लगाउने धारेहात ? केको डर केको सरम कता न्याय कता नैतिकता ? बन्ने संविधान गर्भमा हो कि स्वर्गमा हुँदा र बूढो संविधान हातमा लिन पाउँदा उद्योगपति व्यापारी मात्र होइन आजकाल त कर्मचारी पनि पापाचारी भ्रष्टाधिकारी बन्न सकेकोमा सरकार समेतलाई धन्यवाद !

‘सरकारले उद्योगीका समस्या बुझेर लगानीमैत्री वातावरण बनाइदिने हो भने धादिङले धानेको राजधानीलाई हामी उचित मूल्यमा सेवा गर्न तयार छौँ । हामी वातावरणमैत्री उद्यमीलाई पनि चुरे दोहन गर्ने अवैध उद्योगी सरहको व्यवहार नगरियोस्’ भनेर सार्वजनिक घोषणा गर्ने धादिङका रोडा उद्योगी राजु रेग्मीको आवाज र अर्का उद्योगी सुमनको समर्थनलाई सरकारले नसुनेर रोडामा झनै रडाको मच्चाउन सफल भयो । यस्तो समय समयमा जिब्रो बटार्ने र टार्ने लोकतो सरकारलाई महँगीको मारमा परेका जनताको तर्फबाट लोकतान्त्रिक धन्यवाद !

उद्योग व्यवसायलाई प्रोत्साहन दिई नियमको दायरामा राखेर शासन चलाउन नसकेर कागजी निर्णय गर्दै कागज च्यात्दै गरेर रोडा, ढुङ्गा, बालुवाका वैधअवैध व्यापारीलाई एउटै टोकरीमा राखेर अझै पुससम्म भाउ र दाउ पारेर खाऊ भन्ने सरकारलाई घर बनाउँदा बनाउँदै डबल महँगीको मारमा परेका जनताको तर्फबाट कसरी नदिने धन्यवाद ?

बहादुरले बढाएका महँगीमा मरिहत्ते किन हाल्नु ? मासु महँगिए मासु नखानु, दालचामल महँगिए सागपात मात्र खानु । कपडा महँगिए आधुनिक केटीहरूले झैँ नाङ्गै हिँडिदिनु, रोडा बालुवा महगिँदा पराले छाप्रा बनाइदिनु । अनि पो बैँकबाट लोन लिएर रोडामा रडाको गर्ने यी उद्योगी भोगी नभएर भोलिको जोगी बन्ने अवसर पाउँदा उनैले दिने थिए धन्यवाद !

रोडामा रडाको मच्चाइदिएर महँगीको सुशासन चलाउने सरकार फलबिनाको सफल भएको मान्नै पर्दछ । यसरी सबै प्रकारको सफलता हासिल गरी लोकतान्त्रिक सरकार हुन सफल भएकोमा जनताको तर्फबाट सरकारलाई अन्तिम धन्यवाद दिनुनै उचित होला । सबैलाई चेतना भया ।

ट्याङला, कीर्तिपुर