एक पटक सवैको, चलेको देखेको छु
समयले नि रङ्, बद्लेको देखेको छु ।

यी त मेरा आफ्नै, मान्छे भन्छौ तिमी,
आफ्नैले आफ्नालाई, छलेको देखेको छु ।

अग्लो छु भनेर, व्यर्थै गर्व गर्छौ,
मैले धरहरा, ढलेको देखेको छु ।

कतिञ्जेल हाल्छौ, बन्दुकको सिरानी,
मैले फलाम पनि, गलेको देखेको छु ।

झ्याल ढोका थुनेर, विरालो नकुट,
मैले उसको आँखा, बलेको देखेको छु ।

भो नकुद सधैं, पद र पैसाकै पछि,
मैले मान्छे नाङ्गै, जलेको देखेको छु ।

हेटौंडा