चोरपाटी जिन्दावादको नाराले टोल थर्किएको सुनेपछि म आँखा मिच्दै बरण्डामा निस्कें । असङ्ख्य प्लेकार्ड बोकेका मानिसहरू थिए जुलुसमा । प्लेकार्डमा एक नजर लगाएँ ।
एउटा थियो घुससमूह । घुससमूहको ब्यानरमा सङगठितहरूको प्लेकार्डमा लेखिएको थियो, “घुसखान पाउनै पर्छ । कमिशनतन्त्र जिन्दावाद । भ्रष्टाचारलाई, सदाचार भन । घुस लिन्या र दिन्या असल नागरिक हुन् । असल नागरिकको कदर गर । घुसराज्यको घोषणा गर ।”
अर्को समूह थियो खल्ती खलास । उनीहरूको ब्यानरमा सङगठितहरूको प्लेकार्डमा लेखिएको थियो, “खल्ती काट्ने एक हौं । खल्तीखलास, मौलिक अधिकार हो । खल्ती खलासलाई संवैधानिक हकका रूपमा व्यवस्था गर । खल्ती खलास राज्यको घोषणा गर ।”
अर्को समूह थियो, डाकाको । उनीहरूको ब्यानरमा सङगठितहरूले देखाएको प्लेकार्डमा लेखिएका थियो, “हातहतियारका हामी मतियार, हामीसँग नेताहरू होसियार । हामी राजनीतिका पाना हौं, राजनीतिक नेताका दाना हौं । हुलहुज्जत जिन्दावाद, लाठी गोली जिन्दावाद । हाम्रो हक अधिकार देखियोस्, संविधानमा लेखियोस् । हाम्रो राज्य जिन्दावाद ।”
केहीबेर नारा लगाइसकेपछि उनीहरूले चौबाटोमा कोणसभा गर्न लागे । प्रमुख अतिथिले हात ठाडो पार्दै लालसलाम गरे । अतिथिहरू कसैले जयनेपाल भने त कसैले नमस्कार । कार्यक्रमका उद्घोषकले माइकमा ट्वाकट्वाक हान्दै उद्घोषण सुरु गरे ।
“कोही केटी चोर्छन्, कोही भेटी चोर्छन्, कोही दुबै चोर्छन् ।
कोही गाई चोर्छन्, कोही भाइ चोर्छन्, कोही दुबै चोर्छन् ।
कोही ढुकुटी खान्छन्, कोही सुकुटी खान्छन्, कोही दुबै खान्छन् ।
कोही पकेट काट्छन्, कोही लकेट काट्छन्, कोही दुबै काट्छन् ।
चोरैचोरको माझमा, चोरैचोरको गाँझमा,
सबैलाई चोर अभिवादन, लालसलाम, नमस्कार जयनेपाल, मधेश
भित्रभित्र हाम्रै राज, यसो भन्न के को लाज ।
आदरणीय पेसाकर्मी साथीहरू
खोरभित्र पस्नेले खोरपाटी जिन्दावाद भन्लान्, जोरपाटीमा बस्नेले जोरपाटी जिन्दावाद भन्लान् । ती सबै सा“गुरा नारा हुन् । फराकिलो नारा बनाउन त चोरपाटी जिन्दावाद भन्नुपर्छ । किनभने चोरपाटीमा कुनै क्षेत्र, वर्ण, धर्म, भूगोल तथा जातजातिको विभेद हुँदैन । तपाइ विहारको हुनुहोस् कि चोभारको, लगनखेलको हुनुहोस् वा जाउलाखेलको, दुधपाटीको हुनुहोस् कि भैसेपाटीको यो पाटीमा निर्वाध रूपमा सङगठित हुन पाउनुहुन्छ । चोरपाटीको महाअधिवेशन हुँदैन, महाअधिवेशनको प्रारम्भमा ठूलो र्याली भएको छ । हाम्रा प्रमुख अतिथि, अतिथि कामरेड, महानुभावहरू आइसक्नुभएको छ । यो सभालाई सम्वोधन गर्नुपूर्व हामी हाम्रा पेसाकर्मी साथीहरूले सिर्जना गर्नुभएको चित्र, फोटो आदिको प्रदर्शनी गराउछौं त्यसपछिमात्र हाम्रो आधिकारिक सभा सञ्चालन हुनेछ । सभा सञ्चालन गर्ने कार्यका लागि हाम्रा चोर सरदारहरूले रु एक करोडको सहयोग गर्नुभएको छ । हामी उहालाई पछि राइफल पड्काएर सम्मान गर्ने छौं ।” उद्घोषकले भने र फोटो तथा चित्र प्रदर्शनितिर लागे ।
‘प्रहरी ज्यादती’ लेखिएको एउटा चित्रमा प्रहरीले डा“कालाई हतकडी लगाएको चित्र देखाइएको थियो । ‘सामाजिक विकृति’को शीर्षकको चित्रमा समाजका मानिसहरूले पाकेटमारलाइ समातेर कुटिरहेको चित्र थियो । महिलाको घाटीबाट सिक्री छिनालिरहेको चित्रमा बहादुर साथीलाई सलाम लेखिएको थियो ।
‘चन्दा असुली’ गरिरहेको चित्रमा राजनीतिक दलको रातो झण्डा राखिएको थियो
ठेक्कापट्टा गर्ने कार्यमा मुन्द्रे मुसलेहरूले गरेको प्रदर्शनमा नेताहरूले हात हल्लाइरहेका थिए । एउटा हातले घुसलिएर अर्को हातले नेतागणलाई हस्तान्तरण गरिएको दृश्यलाई नेतागणले अभिरुचिपूर्वक हेरिरहेका थिए ।
मन्त्रीले प्रशासकलाई कुटेको फोटोको माथि ‘हाम्रा साहसी नेतालाई सलाम’ । न्यायालयले सजाय सुनाएका व्यक्तिहरूलाई ‘वीर पराक्रमी योद्घाहरू’ भनेर चिनाइएको थियो भने न्यायालयको ढोकामा बञ्चरोले हानिरहेको दृश्य देखाइएको थियो । सबै चित्र अवलोकन गरिसकेपछि अतिथि र प्रमुख अतिथिहरूले भाषण ठोके । प्रमुख अतिथिको भाषणको सार यस्तो थियो ।
आदरणीय साहसी वलिदानी साथीहरू
यो गौरवमय पार्टीको महाअधिवेशनको उद्घाटन गर्ने अवसर दिनुभएकोमा म हार्दिक धन्यवाद र आभार प्रकट गर्दछु । वास्तबमा यो पार्टी महान छ यसमा कुनै संङ्किर्णता छैन । यो दललाई राज्य दिदा कुनै भौगोलिक सिमाना आवश्यक छैन र कुनै जातजातिको घेरा पनि आवश्यक छैन । संसारभरिका चोरहरू एक हौं भन्ने नाराको सार्थक प्रयोग यही दलबाट सम्भव हुन्छ । यस पार्टीमा लागेका हाम्रा योद्घाहरूले हाम्रो राजनीतिमा ठूलो गुन लगाउनुभएको छ । यद्यपि तपाइहरूले बेलाबखत हाम्रो इसारा नबुझ्ने वा बुझीबुझीकन अटेरी गरेर जनताको प्रहरी बन्ने महत्वाकांक्षा राख्नेहरूबाट प्रताडना भोग्नु परेको छ । हामीले निर्देशन दिएका छौं, सकेसम्म तपाइहरूले बारदात गरिरहेका बखत सुरक्षाकर्मीहरू नपुग्नुस् । कसैले समातेर जिम्मा लगाइदिए भने हिरासतमा राखेको र कार्बाही गरेको अभिनय त गर्नुस् तर साच्चै कार्बाही नगर्नुस् । कहिलेकाहीँ सञ्चारमाध्यमहरूले पनि रडाको मच्चाइदिएर तपाइहरूलाई मर्कामा पारिदिने गरेका छन् । हामी त्यस्ता सञ्चार साधनलाई ठीक पार्नेछौं । यसका लागि हामीले हाम्रै सञ्चारमाध्यम पनि बनाएका छौं । कहीलेकाहिँ हाम्रै सञ्चारमाध्यमले पनि तपाइहरूलाई गाली गरेका हुन सक्दछन् त्यसलाई यहाहरूले अभिनय सम्झीदिनुहोला ।
अन्तमा तपाइहरूको महाअधिवेशन सफल होस् र सक्षम डनहरूलाई कार्यसमितिमा चुन्न सफल हुनुहोस् । तपाइहरूकै सफलतामा हाम्रो अस्तित्व निर्भर गर्ने हुँदा हामी तनमन र धनले सहयोग गर्नेछौं । हवस् त धन्यवाद, लालसलाम, जयनेपाल, चोरपाटी जिन्दावाद ।”
प्रमुखअतिथिले भाषण समाप्त पार्दा झनै जोडले ताली बज्यो र हावामा खुडा, खुकुरी, बन्दुक र तलबार हल्लियो । ‘चोरपाटी जिन्दावाद’ लेखेको बेलुन हावामा उड्यो । म डरले लगलग काप्न थालें ।
ए किन कापेको हँ ? पत्नीको चर्को आबाजले सपना टुट्यो तर कानमा उही आबाजले साम्राज्य बनाइरह्यो, चोरपाटी जिन्दावाद
धादिङ