भोले बाबा सुनिदिनुहवस् प्रार्थना यत्ति लागोस्
नेतालाई बिलकुल कुनै रोग लाग्दै नलागोस्
चिन्ता सुर्ता अनि धङधङी भोकतिर्खै हराओस्
मर्ने बेला यदि छ त भने तत्क्षणै काल आओस् ।।

यी जे खान्छन् यस मुलुककै एकले लाख भाग
तिर्खा लागे रगत पिउनन् देशकै छैन लाज
खोकी लाग्दा पनि डलरको खर्च थैला न थैला
सित्तैँ पाए घट घट पिई चाट्तछन् चूक घैला ।।

हाम्रो जस्तो मुलुक बिचरो खर्च सक्तैन धान्न
कालै आई पनि किन हरे ज्यान सक्तैन तान्न
यौटै मात्रै अब त छ यही देश बच्ने उपाय
भोले बाबा यति मनन होस् देशसंरक्षणाय ।।
कमलपोपोखरी, काठमाडौं