एउटै कुरो
बाकल हैन रुख भित्र दरो चुरो भए पुग्छ
नेताज्यूको भाषण भन्दा मुटु सूरो भए पुग्छ ।
प्रदर्शनमा झुण्डिएको अल्छीपाटे माल भन्दा
धरती जोत्ने गोरुसँग ठाडो जुरो भए पुग्छ ।
जनताले राष्ट्र पाउन विशाल क्षेत्र के जरुरी ?
नेपाल जस्तै चिटिक्कको सानो भुरो भए पुग्छ ।
जातजाति टुक्रिएको टाक्रेटुक्रे बाहाँ हैन
एकै छानो ठड्याउने साझा धुरो भए पुग्छ ।
नानाभाँती लक्ष भन्दा गर्ने मात्र भन्दा राम्रो
नेपालीको शिर नझुकोस् एउटै कुरो भए पुग्छ ।
२०७१ पौष
काठमाडौ