लक्ष्मण गाम्नागेअब मुड्के संविधान
आठ वर्षअघि नेताहरू दुई वर्षमा संविधान बन्छ भन्थे । अलि पछि दुई महिनामा बन्छ भन्न थाले । अस्ति एक नेताले एक सातामा बन्छ भन्दै गर्दा अर्कोले दुई घन्टामा बन्छ भनिदिए । ती नेताको अनुसन्धान अनुसार सबै दल र नेता मिले भने त्यस्तो चमत्कार हुन्छ रे !
दुई होइन, अब आधा घन्टामै संविधान बनाउने गरी नेताहरू मिल्ने लक्षण देखिँदै छन् । नेता र दलहरू मिले मात्रै होइन, नमिले पनि अब संविधान बन्ला जस्तो छ । आठौँ वर्षको ८ माघ आउन आठ दिनअघिदेखि नै नेताहरूमा संविधान बनाउने जाँगर उग्र रूपमा प्रकट हुन थालेको छ । उनीहरू झन् झन् जोसिला र जुझारु हुँदै आएका छन् । संविधान लेख्न भन्दै उनीहरू पाखुरा सुर्किन थालेका छन् । तिघ्रा ठटाउन थालेका छन् । दाह्रा किट्न थालेका छन् ।
संविधान निर्माण प्रक्रियालाई तीव्रता दिन क्रान्तिकारीहरू रगतको खोलो बगाउन पछि नपर्ने भन्दै छन् । सत्तापक्षीय सभासद्हरूले जस्तोसुकै मुठभेड गर्नु परे पनि गर्ने तर यसपालि बानेश्वरबाट रित्तो हात नफर्किने घोषणा गरेका छन् । रित्तो हात नफर्किने भनेपछि उनीहरू पाए संविधान लिएर फर्किने होलान्, नपाए प्रतिपक्षी सभासद्का बंगारा लिएर अथवा आफ्नै भाँचिएका हातखुट्टा लिएर फिर्ने होलान् । यस्तो भव्य तयारी हुँदै छ हाम्रोे संविधानसभामा, संविधान घोषणाको ।
प्रमुख प्रतिपक्षी दलले आफ्ना सभासद् र नेताहरूलाई उपत्यका नछाड्न कडा निर्देशन जारी गरेको छ । सत्ताधारीहरूसँग मुठभेडका लागि सबैलाई तयार बस्न भनेको छ । बलियाबांगा, पूर्वलडाकूहरू र तन्नेरी सभासद्हरूलाई ज्यानमा तेल घसेर संविधान बनाउने तयारी अवस्थामा रहन निर्देशन दिएको छ । बलियाहरूले अघिल्लो पंक्तिमा र रोगी, दुब्लापातला एवं बूढा सभासद्हरूले पछिल्लो पंक्तिमा बसेर मुठभेड गर्न आवश्यक प्रशिक्षण पनि प्राप्त गरिसकेका छन् । \’कसकसको टाउको फुट्छ, हेरौँला\’ भनेर ठूलै नेताले प्र तिपक्षीहरूलाई चुनौती दिएको खबर पनि आएको छ । यसरी संविधान लेखनको अन्तिम तयारी पूरा भएको छ । अब कसैले विधि वा प्रक्रिया वा सहमति वा के-के जाति भनेर वातावरण बिगार्ने काम गर्नु हुँदैन । अब संविधान बनाउनैपर्छ, मुड्के संविधान ।
संविधान बन्ने पक्का भएकाले हामी नेपाली जनता पनि ढुक्क भएका छौँ । अब हाम्रो एउटा अन्तिम माग मात्र बाँकी छ, हामीले हाम्रा पि्रय प्रतिनिधिहरूको भाले भिडन्त हेर्न पाउनुपर्छ । सम्मानित संविधानसभाभित्र माननीय सभासद्हरू कसरी हानाहान गर्छन्, त्यो देख्न पाउनुपर्छ । कसरी उनीहरूले एकअर्काको चल्नीमा मुड्की हानेर संविधानविरोधीहरूलाई ठाउँको ठाउँ ठहरै पार्छन् ? उनीहरूले कसरी सुरुवाल तानेर एकअर्कालाई नंग्याउँछन् ? कसरी माननीयहरू बस्ने आसन र रोस्टममा एकअर्कालाई लडाएर घोडा चढ्छन् ? हामीले प्रत्यक्ष हेर्न पाउनुपर्छ । संविधान लेखनको यो नौलो विधिलाई टेलिभिजनहरूबाट प्रत्यक्ष प्रसारण पनि गरिनुपर्छ । हामी देख्न चाहन्छौँ कि हामीले कत्तिको बलिया नेता छानेका रहेछौँ । यही लडाइँका आधारमा हामी तेस्रो संविधानसभाको चुनावमा भोट हाल्न चाहन्छौँ । जसले प्रतिपक्षीका बंगारा हातमा लिएर आउँछ, उसैलाई आफ्नो प्रतिनिधि छान्न चाहन्छौँ । हामी अरू सबै खाले संविधानले अघाइसक्यौँ, अब संसारमै नौलो लात्तीमुड्कीद्वारा लिखित संविधान भोग्न चाहन्छौँ । नयाँ नेपालमा त्यो एउटा इच्छा पनि पूरा गरिदिनूस् नेता महोदयहरू ! तपाईंहरूको वैकुण्ठवास हुनेछ ।
नेपाल साप्ताहिक
