आउनुस् तपाईंलाई कुन सपना मन पर्छ
दिउँसै देख्नुस् एक सपना
र पाल्नुस् एक पल्टन शासकहरू
सभा भाँड्ने सभासदहरू
संबिधान सभा बनाइदिनुस् र
दिनुस् संबिधान नबनाउने अनुमति
सरकार बनाउन सहयोग गर्नुस र
गर्नुस् सरकार नभएको अनुभूति

तपाईंको छाप्रो उधारेर
गर्नुस् मद्दत
बनाउन लथालिङ्ग मुलुकका पार्टीका घरहरू
तपाईंको छाक काटेर गर्नुस् सहयोग
निर्माण गर्न
गरिब कार्यकर्ताका धनी नेताहरू
लेखिदिनुस् उसका नाउँमा तपाईंमा उर्बर जवानीका पाँच वर्ष
फेरि एक पटक खुलेको छ सपनाको बजार ।
काठमाडौं