धन्न मैले गरेको छु यति काम खटी खटी
सर्वस्व घरको सुम्पी जहिलै कुर्सीमा बसी ।
गरून् त अरूले हेरौँ यसरी कामको गति
ठोकुवा गरेरै छाड्छु नभूतो नभविष्यति ।।

यति काम निजी केही गरेको भा कता कता
अहिले म कहाँ पुग्थेँ जाबो साना कुरा यता ।
गरिनँ के सधैँ मैले त्यत्रा काम धमाधम
निजी नोक्सान कत्रो छ म मात्र बुझ्छु त्यो गम ।।

हुर्कंदै अरूका लागि खट्ने खै अरू चिन्दिनँ
मजस्तो विज्ञ वा आँटी खट्ने नै म त देख्दिनँ ।
भन्न सजिलो, गाह्रो छ काम गर्न मझैँ अरू
सक्दैनन् ठोकुवा गर्छु भाग्छन् झन् डरले बरु ।।

गरेका गुण देख्दैनौ कुरा काट्छौ बसी बसी
मात्र विरोधले हुन्न गर्नुपर्छ कसी कसी ।
हेर ती सब मैले नै मेरै त्याग अथाह छ
नत्र ती पहिलै ध्वस्त बन्दथेस अभिमान छ ।।

लगानी अरूकै लागि आफ्ना लागि कहाँ रहेँ
अरूकै लागि यी गाडी घोडा बास सबै लिएँ ।
म जे छु अरूकै देन बाँच्नेशैली सबै कुरा
आफ्ना लागि हुँदै हैन मोज भोज झिना कुरा ।।

बुझ्नु हुन्न कुरा कैलै के गरूँ कसरी भनूँ
डुलेँ वा त्यत्तिका काम गरेको अझ के भनूँ ।
भन्न सक्ने सबै मैले भनेँ बुझ्नू अझै पनि
कस्तो यो दुनियाँ हुन्थ्यो म मात्रै नभए अनि ।।
काठमाडौं