हाकिम साप !
मेरो बिन्ती छ
मेरो गाऊँमा मोटर नपुर्याइदिनुस्
म मेरा गाउँले धरापमा थिचिएको हेर्न चाहन्न ।
हाकिम साप !
मेरो अर्को बिन्ती छ
मेरो गाउँमा बिजुली नपुर्याइदिनुस्
म मेरा गाउँले बत्तिमा पुतलीझैँ टाँस्सिएको सुन्न चाहन्न ।
हाकिम साप !
यो अर्को मेरो बिन्ती
मेरो गाउँमा बिकासे खेती नपुर्याइदिनुस्
म मेरा गाउँले बिसादी छादेर मरेको देख्न चाहन्न ।
साँच्चै सुन्नुहुन्छ मेरो बिन्ती !
सुन्नुहुन्छ भने मेरो गाउँमा–
सुरक्षामा ध्यान पुर्याइदिनुस् मोटरभन्दा पहिले
करेण्टको ज्ञान पुर्याइदिनुस् बिजुलीभन्दा पहिले
रसायनको चेतन पुर्याइदिनुस् बिषादीभन्दा पहिले
मेरो भित्री कुरा भनौँ हाकिम साप !
अरू केही पनि नपुर्याई दिनुस् मेरो गाऊँमा, बिन्ती !
यदि धमिराले खाई नसकेको भए
केवल सुशासन पुर्याइदिनुस्
फगत् सुशासन !
२०७१ चैत्र
काठमाडौ ।