राहतका किटाणु चिनौँ
क्षतिपूर्ति दिने टोली घरमा पुग्न खोज्दछ
सामान्य क्षतिकै लागि हत्ते गर्नु त व्यर्थ छ ।
निर्विकल्प हुनेलाई दिऔँ राहत बेसरी
विकल्प जसमा हुन्छ नलिऔँ त्यो कसैगरी ।
निःशुल्क पाइयो भन्दै कुनै राहत नै पनि
नलिँदाँ नहुनेजस्तो लागे त्यो नलिऔँ अनि ।
पाइयो सहजै भन्दै सक्नेले नलिऔँ कतै
लिएमा ग्लानिको भाव जागोस् आफैँ जताजतै ।
बढी क्षति हुनेलाई सबैको साथ झन् रहोस्
आफूले नलिँदा राम्रो अरूकै हातमा परोस् ।
आफूभन्दा कयौँ दुःखी तिनको सम्झना गरौँ
घाउको अवस्था हेरी मानवी भावना छरौँ ।
बढी लागतको भारी जोसुकैको नहोस् अझै
व्यक्तिको अवस्था हेरौँ यद्वा ल्याकत नै सबै ।
क्षति राहतको काम सबैमा एउटै नहोस्
निरुपाय बुझौँ पैलै तिनकै हातमा परोस् ।
समाज बलियो हुन्छ चिन्छ समाजले सबै
पहिचान गरौँ स्वार्थी लोभी आशक्त वास्तवै ।
किटाणु अरु क्यै हैन लोभी स्वार्थी प्रवृत्ति हो
निःशुल्क पाइयो भन्दै नराख्नु नै नवृत्ति हो ।
उनै पहुँचका व्यक्ति लाभान्वित हुँदै नहून्
चिनौँ कोही भए त्यस्ता तिनका शिर नै झुकून् ।
काठमाडौं