अशोककुमार शिवाविज्ञापन, चाहिनेको छैन नचाहिनेको
फिल्म बनाउनेहरूले अब ट्राफिकको काम पनि गर्न थालेछन् क्यार । सडकमा त्यस्तै देखियो । फिल्म प्रोमोटको नाममा जुन पोसाकका साथ जेब्राक्रसिङमा बसेर मानिसलाई बाटो काट्न सहयोग गर्दै थिए, लाग्थ्यो तिनीहरू मानिसलाई सुरक्षित बाटो कटाउने हैन बरु अल्मल्याएर माथि पठाउने जमर्को गर्दैछन् । बाटो हिँड्ने मानिसहरू सबै पटकपटक तिनले लगाएको ड्रेसतिर हेरेर हिँडिरहेका देखिन्थे । फिल्मको विज्ञापन पनि कुनै खास थिएन । नाम पनि छ एकान छ रे ! कसलाई थाहा छैन छ एकान छ हुन्छ भनेर । बरु छ एकान सात भएको भए चाहिँ कुरा अर्को हुन सक्थ्यो । त्यस्तो जाबोको पनि त्यत्रो तामझामका साथ विज्ञापन गर्नुपर्ने ? सकिएन बा !
सडक जथाभावी पिच होकि थिच गर्या छ । मलाई त लाग्छ त्यो पिच त मरिगए हैन, बरु थिच चैं पक्कै हो । अलि अलि अलकत्रा लागेको गेगर पोखेर थिच्नु बाहेक केही ग¥या हैन । त्यसको विज्ञापन गर्नु नि । बल्ल बल्ल पिच गर्या बाटोमा मानिसको घर घरबाट पानीको निकास पिच गर्यातिर छाडेका छन् । यतिसम्म कि बलेसी भेला भएर झर्ने धारो पनि पिचमै सोझै झर्याछन् । त्यसको विज्ञापन गर्नु नि । जहाँ पायो त्यही माइक्रोले मानिस ओराल्न र उकाल्न रोकेर अरु गाडीहरूलाई पार्नुसम्मको सास्ती पार्या छ, त्यसको विज्ञापन गर्नु नि । सेतो, रातो अनि प्लेट भएका गाडीहरूबाटै छेक्ने गरी धुँवा फालेर कुदिरहन्छन् त्यसको विज्ञापन गर्नु नि । पेट्रोलमा मट्टितेल मिलाएर सर्वसाधारणका सवारीहरू ध्वस्त पारिरहेछन् त्यसको विज्ञापन गर्नु नि । खै के भन्नु भनिसाध्ये भए पो । जताततै यस्तै बेहाल छ । अरबौं खर्च गरेर आकासेपुल बनाएको मान्छे हिँड्नलाई नभएर पसल थाप्नलाई भएको छ खै विज्ञापन ? हिँड्ने बटुवाहरू त बाटैबाटो कुदिरहेका देखिन्छन् । खासै भन्नुपर्दा यहाँ चारपाङ्ग्रेलाई नै सधैं हतारो परेको देखिन्छ । फायर ब्रिगेडले साइरन बजावस वा एम्बुलेन्सले कुनै गाडी साईड लाग्ने हैनन् बरु मौका यही हो भने जसरी कुद्छन् खै विज्ञापन ? साइकलवाला बीच पिचमा अनि कारवाला छेउमा कुदिरहेका हुन्छन् खै विज्ञापन ?
नेपालीहरू जस्तोसुकै फिल्म बनोस् हलमा खचाखच भएर हेरिहाल्छन् किन गर्नुप¥यो विज्ञापन ? एटिएमदेखि चपली हाईट होस् वा लुट, बाउको फेसबुक होस् चलेकै हुन् त, छ एकान छसँग मात्रै के छ होला र त्यस्तो नयाँ । कत्रा कत्रा फिल्मको विना विज्ञापन सो भैराखेकै छ । छ सय एक एकान छ सय एक कम्तिको होला त फिल्म ? खै विज्ञापन ? चल्या चल्यै छ त कहिलेसम्म चल्ने हो कुनै समय निर्धारण नै छैन, चल्या छ चल्या छ । चाहिने कुराको पो बिज्ञापन गर्नु त !!
Email : sauravsagar17@yahoo.com
