मुक्तिबन्धुयहाँ अहिले पनि यस्तै छ
कुनै समय गजराज, राजहस्ति ,हुङ्कारनाथ
अजङ्ग बहादुर कुनै बेला !
गजेन्द्र सिंहेन्द्र रणजङ्ग युद्धजङ्ग तातप्यमान उच्चण्ड गदाधर
दण्ड उद्दण्ड प्रभात विभात नगराज नागराज
नामहरू फेरिए फेरिंदै आए बेला बेला
नयाँ शब्द नयाँ व्याकरण नयाँ व्युत्पत्ति
नयाँ नयाँ संश्लेशण विश्लेषण
नाममै छ सार संसारको जस्तै गरी
फेरिए पनि नाम कमाराहरूको
संस्कृतिसम्पदा फेरिएन
परम्परा र प्रवृत्ति फेरिएन ।
सही सलामत रह्यो परम्परागत मालिक
चर्बणशील दाँत आँत सबै सहीसलामत
नितनवीन भोक, खाने पचाउने धन्धा पुरानै
फरक देखिएको छ त केवल नीतिसङ्कथनसन्दर्भमा ।
पहिलेको मालिक दण्डान्वयले पनि काम चलाउँथ्यो
अहिलेको मालिक खण्डान्वयको सौखिन बनेको छ ।
पहिलेको मालिक गर्जेर पेल्थ्यो ,बन्दुक देखाएर पेल्थ्यो
अहिलेको मालिक खेलेर पेल्छ, गीत गाएर पेल्छ
थरीथरीका चकलेट चुसाएर पेल्छ
खोप्रो छ । खोपामा सपना पनि छ
न मालिक त्यो टिपेर दिनसक्छ
न कमारो त्यो झिकेर लिन सक्छ
यस्तै छ स्थिति
यहाँ अहिले पनि यस्तै छ ।
काठमाडौं
