जस्तै हुरी चले नि !
यहीँ बाँच्छु, मर्छु भन्थेँ जस्तै हुरी चले नि !
कायर भन्यो अचानक बिउँझेर लासले नि !
विश्वास पात्र जो छन् हर्दम सतर्क बस्नू
आफन्त मार्न सक्छन् अर्जुन र कृष्णले नि !
छटपट थिएन केही झन् मस्तले निदायो
कस्तो सितल छ आहा दनदन चिता जले नि !
पिउने कयौं बहाना जुर्छन् अचेल मेरा
बुन्छन् नयाँ कहानी प्याला र साँझले नि !
लेखेर मात्र ठूलो भइँदैन बुझ् तँ बाला
दुइचार शेर बाँचुन् तेरो शरिर ढले नि !