रमेश समर्थनअचम्म नमान
चार सय बोरा सडेर गयो चामल राहतको
राज्यले भने बुझेन कठै समस्या आहतको ।
गोदामभित्र मक्किन थाल्यो रे अरू सामान
त्यसलाई पनि जलाए भने अचम्म नमान ।
पालको भित्र बसेका मान्छे मृत्यु नै कुरेर
राहत पनि पठाउने अरे साइत जुरेर ।
जिउनलाई दिइने पैसा मृत्युको काममा
औषधी गरे देहमा चोटै नभाको ठाममा ।
जाडोमा दिने गरम लुगा गर्मीमा आउला
यो जाडोभरि मरेन भने बाँच्नेले पाउला ।
बरै ! कसले पाउला !!
दुखीको उहाँ जीवन के छ मुसो र बिरालो
बिरालो पनि मर्छ कि भन्ने लाग्दछ पिरलो ।
भीआईपी भनी लगानी गर्छन् अरबौं रुपियाँ
गरिबलाई बनाउन थाले भुसुना उपियाँ ।
यै चाल रहे यो देशबाट हुनेछ अवश्य
गरिबी हैन गरिबमुक्ति विकासे रहस्य ।
गरिबलाई मारेर होला देशको विकास
योभन्दा अर्काे देखेन कठै राज्यले निकास ।
हुन्छ गरिबको विनाश
अनि देशको विकास
साथी एउटै निकास !!
बुटवल
