तिहारमा व्यङ्ग्यात्मक देउसी–भैलोको लागि चर्चित रहेको हास्यव्यङ्ग्य समूह सिस्नुपानी नेपालले आफ्नो यात्रालाई प्रवासमा पनि लैजाने भएको छ । मङ्गलबार पत्रकार सम्मेलन गर्दै संस्थाले उक्त जानकारी दिएको हो ।
सिस्नुपानीले दुई चरणमा यात्रा गर्नेछ । उसले खाडीमा श्रम गरिरहेका नेपालीहरूको क्याम्प क्याम्प र कम्पनीमा गई निशुल्क रुपमा ‘दुई थोपा हाँसो’ कार्यक्रमको प्रस्तुति दिनेछ ।

पहिलो चरणको यात्रा माघ ७ गतेबाट सुरु हुनेछ । दुबईबाट सुरु हुने यात्रा कतार र बहराइन हुँदै माघ २९ गते मलेसिया पुगेर समापन हुनेछ । दोस्रो चरणमा साउदी अरब, ओमान, कुबेत, इजरायल र कोरियामा कार्यक्रम गर्नेछ ।

इस्लिङटन कलेज, सरकारी निकाय तथा अन्तर्राष्ट्रिय श्रम संगठनको सहयोगमा हुन लागेको कार्यक्रममा मनोज गजुरेल, टंकराज आचार्य, लक्ष्मण गाम्नागे, अर्जुन पराजुली, धीरेन्द्र प्रेमर्षी, शिशिर योगी तथा डा.राजु अधिकारी रहनेछन् ।

कार्यक्रममा मुलुक बाहिर बसेर देशमा रेमिटेन्स भित्र्याइरहेका नेपालीलाई तनावबाट मुक्त गराउन र देशका बारेमा जानकारी दिनका लागि कार्यक्रम गरिएको सो अवसरमा जनाइयो ।