सरकारी घोडा
राजा चढे पनि
राणा चढे पनि
नेता चढे पनि
सधै
उस्तै गति
उही चाल
उस्तै मति
उही ताल
जनताको लागि
सुस्ताउँछ गोडा
वा ! सरकारी घोडा ।
कहिले मेची काली कुदेको छ
कहिले काठी फाली जुदेको छ
खाँदै जनताको धान
झार्दै जनतालाई शान
हिनहिनाइ रहेको छ
खोज्दै जोडा
वा ! सरकारी घोडा ।
जति रुप हेरे पनि
जति नाम फेरे पनि
खान्छ यो जनताको नुन
मान्छ यो मालिकको गुण
लाउँदै जनतालाई चुन
जनताको लागि
छ यो टेडा
छ विचित्रको यो
सरकारी घोडा ।
जनताको पसिना
जनताकै घाँस
देखाउँछ सधै
जनतालाई आस
जनतालाई ठगी
मालिकको खास
जनतालाई यो
ठान्दछ भेडा
वा ! सरकारी घोडा ।
कहिले वारि
कहिले पारि
कुदाउँछ गोडा
केही पाइन्छ भनी
बोक्दछ रोडा
बनाउने भन्दा
भत्काउँछ मोहडा
छ गजबको यो
सरकारी घोडा ?
कहिले बन्छ यो
राजतन्त्रे घोडा
कहिले भन्छ यो
प्रजातन्त्रे घोडा
तर जहिले पनि
ठगतन्त्रे घोडा
कहिले बन्ने यो
लोकतन्त्रे घोडा ?
जनतालाई अझै
रणभुल्ल पार्दैछ
खाँदै पेडा
वा ! सरकारी घोडा ।
दाङ, हाल काठमाडौं