साथी महिमा
के भन्नु खै घाउमात्रै, कोट्याउने हुन्छ साथी ।
जैलेसुकै छिद्र खोजी, होच्याउने हुन्छ साथी ।
भन्दै सधैं गर्छु केही, नौलो कुनै जाल थाप्ने,
भेडैसरी घाँस राखी, लोभ्याउने हुन्छ साथी ।
जप्ने सधैं मित्रगाथा, राख्ने सधैं मित्रभावै,
तीखो छुरी मर्म ताकी, सोझ्याउने हुन्छ साथी ।
ठान्ने उँचो मात्र आफै, भन्दै सबै हुन् र के नै,
भन्दै सदा भाइ गल्ती, चोख्याउने हुन्छ साथी ।
खै को छ त्यो काँध थाप्ने, पर्दा कुनै जिन्दगीमा,
थोरैजसो भावना त्यो, ओछ्याउने हुन्छ साथी ।
खलंगा ९, सल्यान
हालः मैतीदेवी, काठमाडौं