सहमती हराएको देश
म,
सहमती हराएको देशको
मान्छे,
सहमती शब्द मेरो नेपाली
शब्दकोशभित्रबाटै
लोप भएको छ
र,त…,
मेरो देशको आँगनमा
हरदम असहमतीको बादबिवादमा
लठारिइे रहेछन्
देश हाँक्छु भन्ने
अहमबादीहरु ।
दम्भ र अहंकारले पोंतिएर
कुबिचारका केस्रा केस्राहरुलाई
मस्तिष्कभित्र गुम्साइे सधैं
पौंठेजोरी खेल्न खप्पिस
तिनीहरु असहमती र
असमझदारिमै रुमल्लिइे
रहेछन् हरदम हरपल ।
जनताका भोका,नाँगा
परिस्थितीसँग खेल्वाड गर्दै
सधैं स्वार्थमा निर्लिप्त बनेका
यी देश पालुवा साँढेहरु
सधैं “अ” शब्दसँगै
नजिक छन् ।
देशलाई माँग्ने भाँडो बनाएर
उनिहरु चाँदिका थालमा भुजा
ज्युनार गर्न र पञ्च धातु मिश्रित
आँखोरामा जल पिउन
अभ्यस्त छन्,
तर सोझासाझा जनता टपरीमा
खोले फाँडो खान सम्म
बहिष्क्रित छन् ।
यसैले म
“अ” शब्दको
सामिप्यतामा हुर्किएको
अनमेल र अप्राप्तीको कुइरीमण्डलमा
कुइरोभित्रको काग झैं
अल्मलिइे रहेछु,
“हुन्छ” र “हो” शब्दहरुको
अक्षर खोज्दै क,ख,राको
बर्णमाला छिचोल्न
ब्यस्त छु
अनि …,
असहमती र असमझदारीको
वाक्य मेटाउन
उद्वेलित छु ।
जनवरी २८/0१४