मेरो अगेनासँग
संशय छ सिंहदरबारलाई

किनकि,
मेरो अगेनाको राप
हराएको छैन

सिंहदरबारका काला छतहरुको
कडा निगरानीले
घेरिएको छ मेरो अगेना
र प्रधानमन्त्रीको कार्यकक्षमा जडित
टेलिभिजनका ऐनाहरुले
मेरो अगेनाको अभिलेख दुरुस्त राखिरहेछ
किनकि सिंहदरबारका
नयाँ प्रधानमन्त्रीका आँखाहरुलाई
मेरो अगेनाको राप मन पर्दैन

जसलाई सधैं
उर्जाशील लाग्थ्यो अगेनाको छेउ
र जसका आँखाहरु अगेनाको
भर्भराउँदो आगो जस्ता थिए
जसका मुठ्ठीहरुले हावामा
सधैं गति पैदा गथ्र्यो
र अँध्यारोलाई पगाल्थ्यो
जसका तातो श्वासहरुले
आँधीको सिर्जना गथ्र्यो
र शासकको निद्रा खल्बल्याउँथ्यो
मेरो अगेनाले तिनीहरुका लागि
सधैं आगोको निर्माण गरिरह्यो

जसले मेरो अगेनाको आगो बटुलेर
छिप्पिएका रातहरुसँग
लड्ने साहसहरु प्राप्त गर्यो
र जसले अँध्यारोलाई समाप्त गर्न
हजारौँ मशालहरुको तयार गरे

अहिले कसरी तिनीहरु
आगोका विसर्जनका खेलहरु
खेलिरहेका छन् ?

कसरी यो अँध्यारोमा फेरिदै गइरहेछ
तिनीहरुको छालाको रङ्ग ?
र तिनीहरुको
आँखाको राप हराइरहेको छ ?

सिंहदरबारका छतहरुबाट खस्दै
प्रधानमन्त्रीका दाहिने गालाबाट
बिस्तारै उठिरहेका
काला नागपास छाँयाहरुले
यो मुलुकलाई कसरी छोप्दै लगिरहेको छ
म देख्दैछु

मेरो अगेनासंग
संशय छ प्रधानमन्त्रीका आँखाहरुलाई
किनकि, मेरो अगेनाको राप
अझै मरेको छैन
र भुङ्ग्राहरु ज्युँदा छन् ।