घैँटेको घैँटो
नयाँ घैँटो फेरौँ भन्यो
यो घैँटेले मान्दै मान्दैन
जति कुरो सिकाए पनि
उचित ठान्दै ठान्दैन
टन्टलापुर घाममा पनि
यो घैँटोमा घाम लागेन
घाम लागे पनि काम लागेन ।
जस्तो पानी हाले पनि ठुस्स गनाउने
मुखमा हाल्यो कि वाक्क बनाउने
घैँटो फेर्न पनि खोज्या हो
नयाँ घैँटो पनि रोज्या हो
तर यी पुराना घैँटाहरूले
जति हल्ला गरे पनि टेर्दै नटेर्ने
नयाँ घैँटोको त मुखै नहेर्ने ।
जति पानी हाले पनि
पानी कता कता हराउने
पानी खान नदिएर
हाम्रै बिजोग गराउने
चैत बैशाखको घाममा पनि
यी घैँटेको घैँटोमा घाम लागेन
घाम लागे पनि काम लागेन ।
कस्ता कस्ता घैँटा यिनी
नयाँलाई मौका नदिने
मौका दिए पनि
पानी ल्याउने नौका नदिने
जस्तो सफा पानी हाले पनि
फोहर बनाउने
यिनको अनुहार हेर्यो कि घृणा
घनघोर आउने
पारिलो घाम लागे पनि
घैँटेहरूको घैँटोमा घाम लागेन
घाम लागे पनि कुनै काम लागेन ।
दाङ, हाल : काठमाडौं