जेलबाट छुट्टेका पूर्व चोरहरूले,
आफ्नो हकहितको गर्न संरक्षण,
चोरीकलाको गर्न प्रवर्धन
नवचोरहरूलाई दिन प्रशिक्षण,
‘पूर्व चोर संगठन’ को गरेका थिए गठन ।

संगठनको वार्षिकोत्सवको उपलक्ष्यमा
आयोजित भव्य समारोहमा
टेबुल कुर्सी टेण्ट माइक सबै थिए चोरीका ।
प्रमुखअतिथि पनि खोजी बनाइए
आफूमै मिल्ने जोडीका ।

देश विदेशका आगन्तुक चोरहरू
को कसैसँग कम शोभिएका थिए सबै चटक्क,
बसेका थिए छानी छानी कुर्सी थपक्क ।
विशाल भेलाका बीच कम्तिमा
पाँचपटक जेल परेका चोरहरूलाई
‘महाचोर सम्मान’ ससम्मान टक्र्याइयो,
खादा र माला लगाइयो,
दोशल्ला ओढाइयो,
भिडियो फोटो खिचाइयो
अभिनन्दन पत्र पढेर सुनाइयो
फुटेको ताल्चाको चाँदीको प्रतिकृति
उपहारस्वरुप सम्मानसँगै टक्र्याइयो ।

समारोहमा त सबै एकसे एक चोर
कसले कसको के फोर्ने– के नै निचोर्ने ।
तर समारोह स्थल बाहिर
भै नै हाल्यो जे थियो हुनु पर्ने ।
चोरी भैसकेका थिए आगन्तुक चोरहरूलाई
बाहिरै खोलाउन लगाइएका जुत्ता
हरे ! घर फर्किनु पर्यो सबैलाई नाङै खुट्टा ।

जब सबैतिरै छ गाईजात्रा नै गाईजात्रा,
मिलाएर हास्यव्यङ्ग्यको ठिकठिक मात्रा
ल हजुरहरूका लागि लेखी सिध्याएँ आजै यो
‘महाचोर सम्मान–२०७२’ को नियात्रा ।

विराटनगर