दुर्गाप्रसाद ग्वालटारेसोध्नै पर्ने कुरा
स्वार्थीपन मान्छेको, रछ्यानको दुनालाई सोध
स्वतन्त्रता के हो रे ? पिंजडाको सुगालाई सोध ।
कहिले आउँछ जवानी, घुम्दै आउँछ बुढ्यौली पनि
तिरस्कारको खास स्वाद, खियायुक्त सुकालाई सोध ।
साउनको आरीघोप्टे, झरीलाई सोध्नु बेकार
थोपा पानी कति पर्छ, खडेरी र सुखालाई सोध ।
निमोठ्नेले धर्म ठान्ला, मन्दिर मस्जिद गुम्बा ताक्ला
निमोठिंदा कस्तो लाग्छ, फूल–पाती र दुबालाई सोध ।
भक्तलाई सोध्छौ भने, भक्ति मात्र संसार लाग्छ
पुजारीको आडम्बर त, ‘प्रसाद’ र पूजालाई सोध ।
२०७३ बैशाख २५
काठमाडौ
