देशको बजेट जब अरब पुग्यो, युवा भागे अरबतिर
अब देशको बजेट खरब नाघ्यो, यो खरब देश छ कतातिर ?
बायुसेवा निगमको त्यो लगानी उड्यो सिद्धियो
अब जलसेवा निगम खोल्छन, नउड्ने डुब्ने भित्रियो ।
(१)

जता फर्क्यो झिलिमिली बिजुली, खानिखानी तेलैतेल
यतै एयरपोर्ट उतै हेलीप्याड देशैभरि रेलैरेल
शहर गाउँ जता जाउँ मेट्रै मेट्रो ठेलम ठेल
घरघर ग्यास टोलटोल उद्योग, सर्प विच्छी भ्यागुतो मेल
तलब भत्ता बढीबढाउ छ, तक्मा सम्मान बाढी भेल
आयो मदारी मसान जगाई काला जादु हेरौं खेल !
(३)

बजेट पास, विधेयक पास, नीति कार्यक्रम पास
प्रस्ताव पास, सरकार पास, आसे पासे सप्पै पास
डिस्टिङ्सन् र फस्ट डिबिजन भन्दा कम क्वै छैन
देश र जनता यी दुई बाहेक फेल हुने कोही छैन ।

काठमाडौं