बिजुलीपानीको नाङ्गो तार– १

हजुर !
सार्वजनिक ठाउँमा,
नांगो बिजुली तार छोएर
मेरो लोग्ने भयो बेहोश
यो त कार्यालयकै छ दोष,
जवाफ फर्काइयो
दोष कस्तो दोष
हामी त शतप्रतिशत छौं निर्दोष,
शहरको बिजुली काटिएको
तीन दिन भै सक्यो,
अलिक पुर्याउनुस् होश।

टर– टरर इन्भरटर– २

हजुर !
एउटा त यस्तो गर्मी
त्यसमाथि स्वास्नीको कर कर,
कसरी गर्ने बन्द यो टर–टर,
जवाफ फर्काइयो
चुपचाप ल्याएर लगाइदिनुस् घरमा
बत्ति, पंखा टिभी सबै चल्ने
‘इन्भरटर’ ।

लोडसेडिङ र नेतालोडिङ– ३

हजुर !
यो लोडसेडिङ कहिले घट्छ ?
जवाफ फर्काइयो
जुन दिन विद्युतमाथि
नेतालोडिङ हट्छ ।

बिजुलीपानी– ४

हजुर !
यो आकाशे बिजुली
र हाम्रो बिजुलीमा फरक के छ ?
जवाफ फर्काइयो
बिजुली र बिजुलीपानीमा जे छ ।

विराटनगर