बिग्रेको घडी
ओरालो झरिरहेकी गाउँले बालालाई
उकालीमा सोधेँ–
‘यो डाँडा काटेर पारीसम्म पुग्नु छ
कति बज्यो होला बैनी ?’
जिस्किइन उनी
‘दाइ, तिमिले बाँधेको घडि कि आलु ?’
भनेँ,
‘ब्याट्री सकिएछ
थाकेर मस्त आराम गरिरहेछन् सुइहरू
तर बैनी
यो घडीले दुईपटक त सही समय दिन्छ ।’
पिँपिरी बजाउँदै
ग्रामीण बाला बेसीतिर झरेपछि
सोचेँ–
ब्याट्री राख्न अल्छी गरेर
कि विचार पनि घडिजस्तो बिग्रेको लगाएर हिँडिरहेछौँ हामी ?
र फुर्ती लगाइरहेछौँ–
‘दुई पटक त सही बाटो देखाउँछ’ !