कलजिब्रे
सन्दर्भ : काबुल नरसंहार र २०७२/३/६
बग्दाद घाँटी रेट्छ
सगरमाथामा रगत बग्छ
काबुलमा बम पड्किन्छ
सगरमाथा थर्थराउँछ !!
के बिगार्यो र ए !
यो सर्वोच्च हिमालले
हमला हुन्छ तारन्तार
मर्म मर्ममा ताकेर !!
पसिना त पोखिँदै थियो
रगतै किन खोज्छन्
आधुनिक आताताई ती
कंसका असूर गणहरू !!
कस्तो संस्कार रैछ त्यो
पाहुनाको भोग खाने !
आदिम कथा जस्तो
जो देख्यो त्यै लुछ्ने !!
भक्कानो परेको छ यहाँ
सिलौटो जत्रो आज
करोडौं छातीहरूमा
कर्मवीरमाथि प्रहार हुँदा !!
अन्याय भा छ घोर
फट्कारिन्नन् किन
काला छन् र जिप्रा यहाँ ?
चुक्चुकायो बेसरी हृदय !!
हाम्रो मुखिया कल्जिब्रे
छिमेकी मुखिया कल्जिब्रे
विश्व मुखिया कल्जिब्रे
मन चिरिएपछि लाग्छ
सबका सब कल्जिब्रे !!
ओ शस्त्रधारीहरू हो !
खोज न मान्छे एक पटक
अन्तरकुन्तर बाँकी
तिम्रो छातीमा पनि छ कि !!
काठमाडौं