हजुरले भन्नुस् न त
यसपाली
भुकम्पले भत्काको घर पक्कै बन्ने हो
पहिरोमा पुरिएको बाआमालाई खोज्न
साँच्चै खन्ने हो
निरङ्कुश भनेर हामीले फालेको
सरकारले पनि यस्तै भन्थे
प्रजातन्त्र भनेर हामीले पालेका
सरकारले पनि यस्तै भन्थे
हजुर त हामीले लडेर ल्याको गनतन्त्रे सरकार
पक्कै झुठो बोल्नु हुन्न होला सरकार
भन्नुस् त
यसपाली जाडोमा पक्कै कम्बल पाउने हो ?

विदेशीले पठाको राहत साँच्चै आउने हो
हजुरले देशको ढुकुटी कुटु कुटु खाँदा
हामीले टुलु टुलु हेरिरहिम
हजुरले सडक, पुल,खोला सुटुसुटु खाँदा
हामीले लाटोले झै हेरिरहिम
भन्नुस त नढाटीकन सरकार
हाम्रो पसिना खाएर हजुर
अब कहिले अघाउने हो
हजुरको लागि हामीले रगतको खोलो
कहिले सम्म बगाउने हो ?

सरकारले भनीसिन्छ भने
हजुरको लागि अझै रगत दिन तयार छौ
हामी रगत दिएर
उडुसलाई पनि पालेकैछौँ
मच्छेरलाई पनि पालेकै छौँ
जुकालाई पनि पालेकै छौँ भने
हजुरलाई पाल्न के गाह्रो
हामपन्थी सरकार आए पनि
बामपन्थी सरकार आए पनि
लामपन्थी सरकार आए पनि
खामपन्थी सरकार आए पनि
हामीले त खाली नयाँ नयाँ सरकार हेर्ने हो
तर थाह छैन यसरी
कसले सरकार घरी घरी फेर्ने हो ।

दाङ, हाल : काठमाडौं