वासुदेव पाण्डेयवाचाल हामी
हामी पागल हौं यहाँ सब जना सद्देहरू देखिए
हाम्रा लागि त जेल नेल अथवा उत्पीडनै लेखिए
हाम्रो क्रन्दन हुन्छ ढोंग र रुँदा हाँस्ने अरू गर्दछन्
हाम्रा शब्दहरू दबाउन यहाँ लाखौँ दफा बन्दछन् ।।
ती हुन् मालिक नम्र बन्न नसिकी वाचाल हामी भयौं
जे गर्छन् सब ठीक मात्र नभनी के सत्य बोल्ने भयौं
आफ्नो दाल र भात मात्र नघिची के न्याय खोज्ने भयौं
यस्ता पाप गरेर दुष्ट दरिने अन्याय गर्ने भयौं ।।
हाम्रो को उपचार गर्दछ कहाँ लाने लगी लौ थुन
को आईकन बन्द गर्छ निचरी हाम्रा बजेका धुन
हाम्रो यो सरुवा छ रोग नसरोस् धेरै अरूमा पनि
जिभ्रै काट कि लोकमान्य भगवन् बोल्दै नबोलोस् भनी ।।
सुर्खेत
