ख्वामित के गरूँ ?
म पनि हाकिम भए
त्यो पनि मसगै हाकिम भो
उसकी श्रीमतीले
महङ्गा गरगहना लाउन थाली
लाएर त के भो र, तर गरगहना लाएर
मेरी श्रीमतीलाई भेट्न आउन थाली
मेरी त्यस्ती सोझी श्रीमतीले पनि
मेरो बिरोधमा गीत गाउन थाली
ख्वामित म त हजुरकै भरमा परेँ
अरुले जस्तो दाँया बाँया नगरी
इमानदारीकासाथ काम गरेँ
ख्वामित, अब के गरूँ
अझै हजुरको भर परूँ कि
म पनि अरुले जस्तै दाँयाबाँया गरूँ ।
ससुराल जाँदा पनि साली भन्छे
अरु सरकारी हाकिम रे
म चाहिँ तरकारी हाकिम रे
सालो पनि भन्छ
अरु गाँठवाला हाकिम रे
म चाहिँ टाटवाला हाकिम रे
भन्नुस् न ख्वामित म के गरूँ
हजुरकै भरमा परूँ कि
अब अरुले झै क्यै गरूँ ।
म पनि के गरूँ त ल
कहिले हजुरलाई
हजुरका चित्रगुप्तले
कुरो लाउलान् कि भन्ने डर
कहिले हजुरका दूतले
समाउलान कि भन्ने डर
गर्नेले तलमाथि गरेकै छ
नगर्ने बिचरा म जस्तै मर्कामा परेकै छ
अब त रिटायर्ड हुने बेला नै भइेसकेछ
भन्नुस् त ख्वामित, अब के गरूँ
अझै हजुरको भर परूँ कि
म पनि अरुले जस्तै दाँयाबाँया गरूँ ।
दाङ, हाल काठमाडौं