नेपाली हास्यव्यङ्ग्य अनलाइन पत्रिका

हामी भेडा
सिङ नभएका भेडा
हिङ नभएका भेडा
हामी यति भेडा कि
स्यालले आश देखाए पनि भ्या गर्ने
ब्वाँसोले घाँस देखाए पनि म्या गर्ने
हामी त्यति भेडा कि
ब्वाँसोले घाट देखाए पनि पछि पछि लाग्ने
ब्वाँसोले फाँट देखाए पनि पछि पछि भाग्ने
र
सजिलै उसको पञ्जा पर्ने
फेरि उसैले
हामीमाथि नै रजाइँ गर्ने
हामी यति भेडा कि
स्यालले टाइचन धान देखायो कि दङ्ग पर्ने
स्यालले संविधान देखायो भने पनि दङ्ग पर्ने
र
फेरि यिनीहरूले नै हामी माथि कजाइ गर्ने ।

हामी यस्ता भेडा कि
हुँदै नहुने कहानीको कुरा गरे पनि ताली ठोक्ने
आउँदै नआउने
मेलम्चीको पानीको कुरा गरे पनि ताली ठोक्ने
हामी त्यस्ता भेडा कि
समुद्रै नभए पनि
पानी जहाज कुरा गर्दा पनि ताली ठोक्ने
दिनहुँ खस्ने
हवाइ जहाजका कुरा गर्दा पनि ताली ठोक्ने
हुँदा हुँदा यति भेडा कि
हामीलाई शहीद बनाई
हाम्रै मुल्य तोक्दा पनि रमाउन खोज्ने
हामीलाई घाइते बनाइ
घाइतेको मुल्य तोक्दा पनि कमाउन खोज्ने
हामी भेडालाई कहिले जुक्ति आउने ?
अरुबाट भन्दा
यी ब्वाँसा र स्यालबाट कसरी मुक्ति पाउने ?

दाङ, हाल काठमाडौं