अल्छे आशे निशदिन यता फर्किने थोर देखें,
नेपालीकै हिमशिखरमा फक्रिने धेर देखें ।
मेरा बाबा ! अझ गरिदिनोस् औषधी खाद्य बन्ध,
नाकाबन्दी अझ हुनगए हुन्छ नेपाल दक्ष ।

बिर्सेलान् वा अलिकति दया फेरि पर्ला कि गर्नु,
हेप्दा राम्रो अझ हुनगयो पर्छ होला कि हेप्नु ।
हिन्दुस्तानी सब जन मिली देश नेपालमाथि
नाकाबन्दी जति जति गरौं पुग्छ नेपाल माथि ।

पाकिस्तानी सम नजरले हेर्नु होला कि राम्रो,
बाटो छेकी निशदिन अझै लुट्नु होला कि राम्रो ।
वाक्कै हुन्थे पर मुलुकको आश छोड्थे सबैले,
फर्की आफ्नै हिम गिरि नदी पुज्नथाल्थे सबैले ।

चौड़ा बाटा शहरभरि नै द्रूतगामी हुँदैछन,
बाँझा बारी चउर र गरा धानबाला झुलेछन् ।
पैलै भन्दा मुलुक अहिले स्वावलम्बी भएछ,
नाकाबन्दी अझ हुनगए बन्छ नेपाल दक्ष ।

फर्की आएँ निज भवनमा देश नेपालदेखि,
राम्रो लाग्यो बहुत दिनमा देश नेपाल देखी ।
मान्छे आयो दिल मन उतै लाग्छ नेपालमाथि,
नाकाबन्दी अझ गरिदिए पुग्छ नेपाल माथि ।

८ नोभेम्बर २०१७
स्थानस्सिलगड़ी (हाल भारत)