म बेचूँ म बेचूँ सबै खेतबारी
जुटाएर राखूँ निकै खर्च भारी
घटाएर बेचूँ घडेरी म झट्टै
चुनावी चटारो उकासूँ बिछट्टै ।

उठेँ बल्ल आफू चुनावी तरङ्ग
जुटाऊँ लुटाऊँ भरी रङ्ग रङ्ग
कहाँ मिल्छ यस्तो सुनौलो खजाना
जहाँ पुग्न पाए सधैँ भव्य खाना ।

लिई साथ पैसा निकै गर्न सक्छु
यताको उताको सबै भर्न सक्छु
कतै किन्न पाए किनेरै म जित्छु
कि वा आँट गर्दै छिनेरै म जित्छु ।

हिजोसम्म होला कुनै वर्ग मेरो
सधैँ बस्नुपर्ने हुँदै हुन्न घेरो
नयाँ चालले हेर नौलो छ पार्टी
जितेरै म छाड्छु बनेको छु आँटी ।

कहाँ झुक्नुपर्ने कहाँ फुक्नुपर्ने
कहाँ धाकधम्की कहाँ लुक्नुपर्ने
सबैमा म आफू भएँ दक्ष आज
चुनावी चटारो उठेँ है समाज ! ।

दिए हुन्छ निर्धक्क यौटे छ भोट
कतै खर्च लागे लगे हुन्छ नोट
खुला नै छ छाती जिताएर हेर
नयाँ राष्ट्र हाँक्ने अरू को छ वीर ।

काठमाडौं