सब ठीकठाक छ
भर्खर–
सफा स्कूल ड्रेसमा 
उनकै उमेरको फुच्चेले मेरा छोराछोरीलाई
लगेको छ स्कूलमा छोड्न ।
मेरा बाआमा वृद्धाश्रमको आँगनमा घाम ताप्छन्
दाजुभाईसित अग्लो पर्खालले छुट्टिएको छु 
घरमा शान्ति छ
झैंझगडा कम सुनिन्छन्
मेरी श्रीमति चुपचाप टिभी सिरियल हेर्छे दिनैभरि
सोच्न सकिन्छ–
सब ठीकठाक छ ।
म आफ्नै बाटो हिँड्छु
सबसित मिलेको अभिनय गर्छु 
घरमा पूजाकोठा छ
पूजाकोठामा आराध्य देवीदेवता छन्
नियमित पूजाअर्चना चलेकै छ
भन्न सकिन्छ–
सब ठीकठाक छ ।
केहीले मन दुख्दैन मेरो
किनभने मनलाई यस्तै बनाएको छु 
पीर चिन्ता कमै लाग्छ 
अर्काको मामिलामा हात हाल्दिन 
यीयस्ता झमेलाहरूदेखि आफूलाई टाढै राख्छु
कि, अनावश्यक टाउको दुखाउँदिन म
हो त–
सब ठीकठाक छ ।
कमजोरीहरू ढाकछोप गर्छु 
गलतीहरू लुकाउँछु
आफूलाई समष्याहरुबाट जोगाउँछु
हरेक बिग्रिरहेको काम मिलाउन सक्छु 
यसकारण –
सब ठीकठाक छ ।
म 
आफू राम्रै देखिने कोसिस गर्छु 
आफू राम्रै लगाउँछु
आफू राम्रै खान्छु
साँच्चै–
सब ठीकठाक छ ।