एक
डाँकालाई भाला मन पर्छ
प्रेमीलाई माला मन पर्छ
आबस्यकता आ(आफ्नो हो 
युवतीलाई बाला मन पर्छ ।

दुई
यहाँ कोही सरकारी ढुकुटी लुटेर बाँचेका छन्
यहाँ कोही बगरको गिटी कुटेर बाँचेका छन्
बेइमानी गर्ने र पसिना बगाउने फरक छ 
कोही काम गरेर, कोही गफ चुटेर बाँचेका छन् ।

तीन
मलाई डर लाग्छ तिम्रो उदासिन अनुहारमा पीर देखेर 
मलाई डर लाग्छ तिमी हिंड्ने बाटोछेउमा भीर देखेर 
कहिलेकाहीं म आफैलाई पनि आस्चर्य लाग्छ कि 
अखबारको पानामा ज्यानमारा हाँसेको तस्बीर देखेर ।

चार
मान्छेको अनुहारमा उसको आचरणको चित्र हुँदैन
मान्छेको जीवनमा उसको सबै परम मित्र हुँदैन
मान्छेको भित्रि र बाहिरी आवरण चिन्ने सकिन्न 
जो आफुलाई महान ठान्छ, उसैको असल चरित्र हुँदैन ।

पाँच
पुरानो चोर अब नयाँ चोर बनेर आयो
जो चोर हो उसैको ठूलो स्वर बनेर आयो
यो शहर आफन्तकोलागि नै पराइ हुन्छ 
हिजो जोर थियो आज बिजोर बनेर आयो ।

कार्तिक, २०७४