विचारको वधशालामा काटिएका 
सहस्र पशुहरूको 
अँध्यारो जुनी पार गरेर
मान्छेको कोखमा जन्म लियौ ! 
तर एउटा सत्यलाई नबिर्स— 
अझै पनि तिमी पशु नै हौ ! 

तिमी पशुव्यापारीका 
थाङ्ना धुन जन्मिएका हौ ! 
रङ्गीन झन्डाहरूको भारी बोक्न 
सपनाको भित्तामा पोस्टर टाँस्न 
र हरेक चुनावमा कुनै प्रश्न नगरी 
एउटा भोट दिन जन्मिएका हौ ! 

तिमीले जुनीभर आफ्ना लागि 
कहिल्यै भोट माग्ने छैनौ ! 
तिम्रो चुनावचिह्न 
हुने छैन यस जुनीमा ! 
तिमीले संसार बदल्ने 
कुनै विचार जन्माउने छैनौ ! 
तिमी आफ्नो आत्माको 
मालिक बन्न सक्ने छैनौ ! 
.
चुनावमा भोट दिइसकेपछि 
तिमी मासुको 
निर्जीव थुप्रो मात्रै बाँकी रहनेछौ ! 
अनि आफ्नै मालिकलाई 
कि उसका प्रतिद्वन्द्वीहरूलाई 
गाली गर्दै रुनु 
तिम्रो स्थायी पेसा हुनेछ ! 

जब पशुव्यापारीहरूले 
बिस्तारै चिर्नेछन् तिम्रो छाला 
र तिम्रै काँचो मासु बेचेर 
वधशालामा हाँस्नेछन् तस्करहरू,
त्यसपछि मात्र 
तिमीले चिन्नेछौ अपराधी 
र आफ्नो काटिएको हात सम्झेर 
मूर्छित हुनेछौ तिमी ! 
.
हे असल र बफादार पशु ! 
कुनै पशुबजारमा 
बेचिनुभन्दा अगाडि यति सोच !! 

२०७४ जेठ १७