ब्यालेट बक्सभित्र के छ ? 

शिशिरको बूढो रुखझैँ 
लगलग काँपिरहेका छन्—
उम्मेदवारहरू ! 
पार्टीका कार्यकर्ताहरू ! 
समर्थक र मतदाताहरू ! 

ब्यालेट बक्सभित्र 
जे पनि हुनसक्छ ! 
कुनै डरलाग्दो 
अजिङ्गर हुनसक्छ ! 
जसले डस्न सक्छ 
राष्ट्रको भविष्य ! 
कुनै खतरनाक 
नरसिंह हुन सक्छ ! 
जसले भत्काउन सक्छ 
अहङ्कारको छाती ! 
 
यदि सत्यको बाटोमा 
हिँडेका छौ भने 
नडराऊ, ढुक्क हौ ! 
ब्यालेट बक्सभित्र 
हाम्रा एकीकृत 
सपनाहरूको शक्ति छ ! 
विवेकको शक्ति छ ! 
विचारको शक्ति छ ! 
 
चाँडै थाहा हुनेछ— 
ब्यालेट बक्सभित्र के छ ? 
 
२०७४ वैशाख ३०