अख्तियारमा जेठान हुनु प्रहरीमा सालो 
अदालतमा भतिजो होस् कोट लाउने कालो

अनि मात्र राजनीति हुन्छ सफल–सार्थक 
भरिने छ भकारी र सबै डोको डालो

केही मुन्द्रे जगल्टे हुन् सधैं अघिपछि 
आयो आयो हजुर अब आयो तिम्रो पालो

नैतिकता इमान जमान यी त भुत्ते सारा 
जति सक्दो ढाँट प्रभु पेटभरि “खालो”

भीडसित विवेक हुन्न विवेकसित भीड 
च्याते हुन्छ ज्ञान बुद्धि विवेकको टालो

जसले हान्यो उसले जान्यो यही दुनियाँ हो 
सकिंदैन च्यात्न हजुर माफियाको जालो

कोही यहाँ भस्मासुर कोही धुन्धुकारी 
घाइते छ देश मेरो घाउ सधैं आलो ।

चितवन